Tame Parata (Mema mo Te Waipounamu). —Ka patai ahau ki te Minita mo nga Mea Maori, Mehemea ka whakahaua e ia kia perehitia kia kotahi mano nga kape o "Te Ture Kaunihera Maori, 1900," ki te reo Pakeha me te reo Maori, me nga huarahi-whakahaere i raro i taua Ture. He maha nga tono a nga tangata Maori o toku takiwa pootitanga kua tae mai ki au kia whakawhiwhia ratou e au ki etahi kape reo Maori reo Pakeha hoki o nga Ture i paahitia i tera tau, a kaore rawa i taea e au te whakarite i aua tono a ratou. Ki toku whakaaro i te mea ka nui te kaha o nga Maori o tera Motu tae noa hoki ki nga Maori o tenei Motu ki te whawha i te Ture Kaunihera Maori o te tau 1900, koia ahau i mea ai he mea tika kia arohatia ratou e te Kawanatanga ki nga kape o aua ture e hiahiatia ana e ratou.

Timi Kara (Mr. Carroll, Minita mo nga Mea Maori). —He maha nga kape o taua Ture kua tuhatuhaina e te Kawanatanga ki tena wahi ki tena wahi o te motu o Aotearoa. Engari i te mea katahi tonu nga Maori o Te Waipounamu ka whakaatu i to ratou hiahia kia hapai tahi ratou i nga ritenga o taua Ture, no reira kei te marama ahau ki te take i meatia ai kia maha nga kape o taua Ture mo nga iwi o te takiwa o te mema honore. Kaati, ka uia e au mehemea e hia te maha o nga kape kei te Kawanatanga e takoto ana, a mehemea kaore e rite te hiahia i era kape ka whakahaua e au kia perehitia ano etahi kape hei tuhatuha ki nga tangata e hiahia ana. He koanga ngakau tenei, ara, te tahuritanga o nga iwi Maori ki te tirotiro i te ahua o nga Ture hou nei, a koina tonu hoki te huarahi tata e marama ai ratou ki te aronga me te ahua o aua Ture, ara, me whakawhiwhi nga Maori o nga wahi katoa ki etahi kape hei tirotiro ma ratou.