Taite, te 3 o Hurae, 1902.
Whakahoki Mo Te Whai. Korero A Te Kawana.

H. Tomoana — E te Tumuaki, ka nui taku pouri mo tuku ngaronga atu i tera rangi i te paahitanga o te motini mihi atu ki to tatou Kiingi i te paanga atu o te mate ki a ia No reira au ka tu atu nei ki te whakakatu atu i te pouri me te aue o te iwi Maori i to ratou rongonga kua pangia kinotia to tatou Kiingi e te mate, a i te putanga ake o te kupu whakaatu mai e kore e karaunatia te Kiingi i te ra i whakaritea ai, kua noho huihui nga iwi Maori me nga Pakeha o to maton takiwa, ka kite au i te ngakau pouri o nga Maori me taku rongo atu ki a ratou kupu aroha atu ki a ia, ka tu atu ahau ka whaikupu au ka mea atu ki a ratou, heoi ano te mahi tika ma tatou he inoi ki te Atua kia pai mai ia ki te whakakaha i te tinana o to tatou Kiingi. Ka tahuri nga Maori ki te inoi kia whakaorangia te Kiingi, kia roa e ora ana kia takahi ia i nga tapuwae o tona whaea, o to tatou Kuini atawhai kua mate atu nei. I noho tonu nga Maori i to matou kainga i runga i te ngakau pouri, tatari atu ai kia rongo me ka mate ranei to tatou Kiingi honore, ka pai ranei te Atua Kaharawa ki te whakaora i a ia, a no te putanga mai o nga waea whakaatu mai kua ahua pai haere tona mate, katahi ratou ka tino hari me te koa. I noho huihui tonu nga Maori me ta ratou tatari tonu i te Taite tae atu ki te Wiki tae atu ki te Mane, me to ratou hokihoki mai ki taku whare patai mai ai kua tae mai he waea whakaatu mai kei te pewhea ranei te mate o te Kiingi, a no taku kiinga atu kua ahua pai ake te Kiingi, katahi ratou ka tino hari. I au i haere mai nei i taku kainga, e noho huihui tonu ana me to ratou whakaaroaro tonu ki tona mate, me to ratou ki mai ki au mehemea ka page 5watea au ki te whaikupu atu ki te Kaunihera maku e whakaatu atu ki a koutou to ratou pouri me to ratou aroha atu ki to tatou Kiingi i a ia kua pangia nei e te mate. I mua ake nei i pai to tatou Kiingi ki te whaikupu mai ki ona iwi whakaatu mai i tona hiahia nui kia takahi honore ia i nga tapuwae o tona whaea, a tino whakapai atu ana te iwi Maori ki aua kupu ana, me to ratou hiahia nui kia whakaorangia ia kia taea ai e ia te whakatutuki tera whakaaro pai ana. E pouri ana ahau mo toku ngaronga i tera rangi i te putanga o te motini a te Kaunihera, notemea hoki i hiahia ahau kia whakahuatia atu hoki te pouri kua tau nei ki te iwi Maori, a ka pai rawa ahau me ka watea ano tetahi huarahi e taea ai te tuku atu he kupu whakaatu atu i te nui o te pouri me te archa o te iwi Maori. E te Tumuaki kia ora tonu koe me nga mema honore o te Kaunihera.