Whai-Korero Mo Nga Moni a Te Koroni.

No te huihuinga o te Whare i te hawhe-paahi i te whitu karaka i te po, ka takoto te motini kia huri te Whare ki te Komiti i nga Moni. No te whakaaetanga ka tu ko—

Te Hetana (Mr. Seddon, Pirimia, Minita hoki mo nga Moni).—Ka panui atu ki te Whare i te Pukapuka o nga Moni a te Koroni. E toru haora ia e panui ana ka mutu. Me titiro taua pukapuka reo Pakeha i Hansard. Katahi ka motini te Pirimia kia hiki te Whare. Ko te tuunga atu o—

Kapene Rahera (Captain Russell).— He ui atu taku, i runga ano i nga tikanga o tenei Whare, kia whakaaturia mai e te mema honore mo a hea timataria ai nga whai-korero mo te Pukapuka Moni kua panuitia mai nei.

Te Hetana (Mr. Seddon).—Ko taku hiahia hei te Paraire e haere ake nei.

Ka korero poto ko etahi atu mema, te mutunga iho whakaaetia ana te motini.

Heoi hiki ana te Whare i te rua tekau ma rima meneti ki ta tekau ma tahi karaka i te po.

No te Paraire te 23 me etahi ra i muri iho ka Komiti ano te Whare mo taua Pukapuka Moni. No taua ra ka tu ko te kai-arahi o te Apitihana, ara, ko Kapene Rahera, me etahi atu mema Pakeha, tokomaha ano, ka whai-korero mo taua pukapuka, engari kaore i puta he korero ma ratou mo nga mahi e tino pa ana ki te iwi Maori.