Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paremete: 1901

Whare Nohoanga Mo Nga Maori

Whare Nohoanga Mo Nga Maori.

Hone Heke (mema Maori mo te Tai Tokerau).—Ka patai ahau ki te Minita Maori, Mehemea ka whakahaua e ia kia whakahoutia te whare nohoanga o nga Maori i Waipapa, Akarana, ara, me page 65whiriwhiri me whakariterite raua ko te Kai-tiaki o te Katoa kia wahia te whare kei reira e tu ana i naianei, kia hanga he whare pai atu ki taua wahi, kia whakatikaia tona ahua hei tiaki i te ora o nga tangata e noho ana i roto i taua whare?

Timi Kara (Mr. Carroll, Minita mo nga Mea Maori).—He patai tika te patai a te mema honore. Kua uia e au tenei take kt te Kai-tiaki o te Katoa, kua kite ahau ko taua whare Maori i Akarana e awhinatia ana ki nga moni reti e puta mai ana i etahi rahui kei Akarana me Onehunga e takoto ana, ko te huihuinga o aua moni reti e tae ana ki te £194 15s. Ko nga moni e pau ana i te tiakanga i taua whare Maori kaore e neke atu ana i te £30, no reira he ahua nui ano nga moni kei te toe ki te kaute o taua whare Maori. E whakaae ana te Kai-tiaki o te Katoa kua tawhitotia, kua kino, te whare e tu mai nei i reira i naianei, a e tika ana kia whakaarahia he whare hou. Ki taku whakaaro e tino tika ana kia tu he whare nui he whare totika ki Akarana hei painga hei nohanga mo nga iwi Maori e haereere ana ki reira. Ka peratia ano hoki he tikanga mo Niu Paremata, notemea ko nga Maori e haere atu ana e hoki mai ana ranei i nga whenua o raro, a e tika ana ma Taranaki te huarahi, he uaua rawa ka whiwhi ai i te nohoanga i nga hotera o Taranaki. He aha ranei te take, engari kaore rawa nga tangata hotera o reira e hoatu ruma moenga ki te Maori, ahakoa mo te po kotahi anake, no reira raruraru atu nga Maori i te rapunga wahi hei nohoanga hei moenga mo ratou ki reira. Otira e koa ana aua tangata hotera ki te tango i nga moni a nga Maori i runga i te hoko waipiro ki a ratou a kii noa nga puku i nga waipiro kikino, engari ka tono nga Maori kia hoatu he ruma moenga he kai ranei e kore rawa e hoatu. Kaati, he mate tera e tika ana kia ata tirohia, notemea kaore rawa e tika kia waihotia nga tikanga pera, whakahawea iwi, kia mana ana i tenei koroni. Kei te mohio ano ahau he rereke etahi Maori, he rereke etahi; engari i te mea ko tenei mahi whakahawea e whakahawea ana ki te iwi Maori katoa katoa, no reira ka whakahe hoki ahau ki taua mahi. No reira ka whakaarahia e te Kawanatanga he whare nohoanga mo nga Maori ki Niu Paremata. I runga i te whakahuatanga o te utu i tukua mai ki a matou, ki ta matou titiro ka ora noa atu taua whare i a ia ano, kaore he taumahatanga e eke ki runga ki te koroni.

Hone Heke. — Ka whakahaere tikanga ano ranei te Kawanatanga mo te Whare Maori i Onehunga.

Timi Kara (Mr. Carroll).—Ae.