No te hawhe-paahi i te rua ka noho te Tepute-Pika ki runga ki tono nohoanga.

Ka karakia te Whare.

Ka whakahaerea nga motini me nga patai, a ka tae ki te patai mo—

Taieri Kainga Maori.

Tame Parata (mema Maori mo Te Waipounamu).—Ka patai ahau ki te Minita o nga Whenua, Mehemea ranei ka whakahaua e ia kia whakahaerea he tikanga e taea ai te Panuitanga i whakaputaina nei i raro i te ringa o te Kawana i te 23 o nga ra o Maehe, 1901, a i panuitia nei ki roto ki te Kahiti o Niu Tireni No. te 31, o te 28 o nga ra o Maehe, 1901, wharangi 779, te whakatikatika mo runga mo etahi piihi whenua e rua tahi e whakahuatia ana i roto i te kupu apiti ki taua Panuitanga—ara, (1) mo runga mo Tekiona 84, Poraka VI., Takiwa Ruri o Maungatua, Otakou, tona nui 4 eka 2 paati; me (2) mo Tatawai Roto, Otakou, tona nui 121 eka—kia tukua rawatia atu, kia whakamanaai rawatia atu aua wahi whenua e rua ki nga tangata Maori e noho ana i Taieri Kainga Maori?

Te Takana (Mr. Duncan, Minita mo nga Whenua).—Ko te wha eka i korerotia nei e te mema honore i wehea mo nga Maori Ko te Roto i wehea hei mahinga ika, engari kaore i tino kiia ka whakamotuhaketia ki nga Maori anake. Ko te ritenga o taua rahui ka taea te whakatuturu i runga i te whakaputanga o tetahi Panuitanga e ki ana kua rahuitia mo nga Maori e noho ana i Taieri Kainga Maori. Ka taea te peratia i raro i "Te Ture Rahui mo te Katoa, 1881." E hiahia ana ahau hia kerero mai te mema honore mehemea e tino whai tikanga ana kia whakawhaititia taua rahui ki nga Maori anake.

Tame Parata.—Ki taku mohio kaore pea he whakahe mo te haerenga o era atu tangata ki reira, engari kua puta he whakahe mo te haerenga o nga Maori ki taua wahi.

Te Takana (Mr. Duncan).—Maku e whakahau kia whakamutua aua whakahe, kia haere noa atu ai nga Maori ki reira mahi ika ai i nga wa katoa e pai ana ratou ki te haere.