Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paremete: 1901

Pitihana a Te Ao Anaru Me Etahi Atu

Pitihana a Te Ao Anaru Me Etahi Atu.

Te ripoata a te Komiti mo nga mea Maori o te Whare o Runga mo runga mo te pitihana o Te Ao Anaru me etahi atu (Nama 102).

"Kua ata whiriwhiria e ta koutou Komiti te pitihana a Te Ao Anaru me etahi atu, a kua ata rapua hoki nga korero whakamarama mo aua take, a e penei ana te whakatau, ara:—

"E inoi ana nga kai-pitihana kia whakahokia atu ano ki a ratou tetahi whenua e huaina aua ko 'Whatakai' kei roto i te Poraka o Whareama Nama 2, i runga ano ia i nga tikanga i whakaaetia kia rahuitia taua whenua mo nga Maori whatake. E ki ana hoki nga kai-pitihana i hokona taua whenua ki te Karauna e etahi Maori me te kore mohio o o ratou kaumatua.

"I tukuna atu tenei pitihana ki te Tari Hoko Whenua Maori, tukuna atu hoki ki a te Make Kaiwhakawa o te Kooti Whenua Maori, i whakaturia ra ia i te tau 1884 hei Komihana whiriwhiri i nga kereme katoa e pa ana ki nga Rahui Maori i Wairarapa me te tono atu kia tukuna mai he ripoata mo runga mo taua pitihana.

"E tika ana i rahuitia ano tetahi whenua mo nga Maori i Whatakai i te hokonga o Whareama Nama 2 Poraka ki te Karauna i te tau 1853. Engari kaore taua wahi i ruritia i taua wa no reira ka wareware noaiho taua wahi a hokona atu ana e te Karauna. No muri iho ka tahuri te Kawanatanga ki te whakatika i tana raruraru, a whakaaetia ana kia utua he moni kia £150, ki nga Maori whaitake, a whakaaetia ana e ratou taua moni hei whakaea mo to ratou kereme.

"Kua ata tirohia te tiiti i mahia i te 25 o Aperira tau 1875, a kitea ana e ta koutou Komiti kua utua taua moni, tuhia ana e nga Maori o ratou ingoa ki te pukapuka whakaae mo te rironga atu o te moni i a ratou.

"No reira ka whakaaro ta koutou Komiti kaore he tikanga o nga putake e whakahuatia mai ana i roto i te pitihana.

"H. Wiremu, Tiamana.
"Turei, te 1 o Oketopa, 1901."