Paraire, te 20 o Hepetema, 1901.
Teihana Reriwe I Waipawa.

H. Tomoana.—He patai atu tenei naku ki te Minita mo nga Kura, Mehemea ranei kei te whakahaere te Kawanatanga i tetahi tikanga e taea ai te hanga he teihana reriwe mo nga Maori e noho tata ana ki Waipawa, i Haaki Pei? Me ki atu au kua whakaaetia noatia atu taua teihana e te Kawanatanga, a kua hoha noaiho nga Maori i te roa o ratou e tatari atu ana kia whakaritea tau kupu whakaaetanga atu.

Te Waaka—E ki mai ana te Tari Kawanatanga kaore i whakaaetia taua tono. E hiahia ana ano te Kawanatanga ki te whakarite i era tu tono e whaitikanga ana kia mahia; engari e kiia mai ana ki au, he ahua teitei ake o taua wahi me te piki atu o te tereina o tetahi taha heke atu ki tetahi taha, no reira e kore rawa e taea te pupuru te tereina kia tu ki taua wahi, no reira e kore e taea i naianei te whakaae atu te tono a te honore mema, engari pea taihoa atu kia whakatikaia te raina o te reriwe kia kaua e piki atu ki taua wahi. Kotahi ano te maero me te hawhe o te matara atu o te kainga Maori i te teihana i Waipawa, a kua hanga hea arawhata hei whitinga mo nga Maori ma runga ma te piriti o te reriwe, kia pai ai to ratou ara atu ki te teihana. Ka tino koa te Kawanatanga ki te whakamanaki i nga tono totika ina taea te mahi, engari hoki e kitea ana e tino uaua ana tenei tono, e kore rawa e taea inaianei, ma te keri rawa i taua puke e taea ai.