No te hawhe-paahi i te rua karaka i te ahiahi ka noho te Tumuaki ki runga ki tona nohoanga.

Ka karakia te Whare.

No te taenga ki nga patai ka tu atu te mema Maori mo Te Waipounamu ki te patai mo—

Te Pou Kohatu Whakamaharatanga Mo Kaiapoi Pa.

Tame Parata (Mema Maori mo Te Waipounamu).—Ka patai ahau ki te Minita mo nga Mea Maori, Mehemea kua utua atu ki te Komiti Maori te £100 i whakaaetia e te Minita Maori o mua atu i a ia hei tapiri i te whakatuunga o te pou kohatu whakamaharatanga mo Kaiapoi Pa, ara, ki te Komiti Maori i whakatuungia nei hei whakahaere i nga tikanga o taua mahi; a, mehemea kaore ano, me whakaatu mai te take i kore ai i hoatu? I patairia ai e au tenei patai kua pa mai ki a au etahi o nga tangata nana au i pooti hei mema mo ratou, he ui mai, mehemea he aha te take i roa ai te hoatu o te moni i whakaaetia ra mo te whakaarahanga o taua kohatu. Ko taua moni i kiia me utu atu ki te Komiti Maori, ara, ki te Poari whakahaere i nga tikanga o te whakarahanga o taua kohatu.

Timi Kara (Mr. Carroll, Minita Maori).—Ko te moni £100 i whakaaetia nei hei tapiri i te whakaarahanga o tetahi pou kohatu whakamaharatanga mo te Pa o Kaiapoi kaore ano i hoatu. Kei te takoto rite taua moni, engari i mua o te hoatutanga e hiahia ana te Kawanatanga kia mohio ratou me hoatu ki a wai, a kia homai hoki tetahi kaute e whakaatu mai ana i nga moni i kohikohia me nga moni kua whakapaua i runga i te whakaarahanga o taua kohatu. Ko taku tohutohu atu tenei, me utu atu taua moni ki te Poari whakahaere o te Rahui Tawhito o Kaiapoi i whakaturia i raro i te Ture Rahui, &c., o te tau 1898, hei whakaea i nga moni toenga tena pea e takoto hei utunga mo runga mo taua kohatu me ona mahi, a hei moni timatatanga hoki i tetahi kaute moni hei whakapai mo taua rahui. Ka tino pai rawa ahau e ka taea e te mema honore te whakaatu mai ki ahau ko te hiahia tena o nga Maori e pa ana ki taua mea kia hoatu taua moni ki te Poari whakahaere o taua mahi i korerotia ra e ia, a ka ki atu ahau kia whakaotia peratia i naianei tonu.

Ka mutu etahi atu patai a etahi atu mema, ka tahuri te Whare ki te mahi i etahi Pire.

No te rua tekau meneti ki te tahi karaka i te po ka hiki te Whare.