No te hawhe-paahi i te rua karaka ka noho te Tumuaki ki runga ki tona nohoanga.

Ka karakia te Whare.

Pire Whakahaere i Nga Whenua Maori.

Timi Kara (Mr. Carroll, Minita mo nga Mea Maori).—Ka motini ahau kia panuitia tuaruatia tenei Pire pro formâ, ka mutu te pera me tuku atu ki te Komiti mo nga Mea Maori.

Kapene Rahera (Captain Russell, mema mo Haaki Pei).—Kaore te Pire i tuhaina ki nga mema honore, a na reira kaore ano ratou i kite i te Pire. Ka whakatakotoria atu i naianei taku whakahe ki tenei tikanga kino, e tupu ake nei i roto i nga whakahaere o te Whare, ara, me panui pro formâ nga Pire kaore ano i whakaratoa ki nga mema, kaore ano i kitea nga korero o roto. Ko tenei tikanga he whakamana pohehe noa iho i nga hiahia o te Minita. Kua rite ki te ahua, ano kaore kau he mana o nga mema. Mehemea nei e purua ana o tatou matauranga. E noho nei tatou kaore ano tatou i kite noa i te Pire nei, a e kiia ana kaore ano i perehitia.

Te Tana (Mr. Tanner, mema mo Avon).—Ki taku titiro kei te pohehe noa iho ta tatou mahi i nga ture, mehemea nei kei te rapurapu noa iho tatou i roto i te pouri.

Hone Heke (mema Maori mo te Tai Tokerau).—Kaore ano ahau i kite i te Pire nei, a he tono atu taku kia nukuhia te panuitanga o te Pire, me ata waiho kia oti te whakarato o nga mema honore ki te Pire.

Heoi tukuna ana ki te pooti Waahi ana te Whare.

Te putanga, 8.

Heoi whakaaetia ana te panuitanga tuarua o te Pire, a tukuna atu ana ki te Komiti mo nga Mea Maori.

Haere tonu nga mahi a te Whare i etahi atu Pire.

No te tekau ma rua meneti ki te wha karaka i te ata tu ka hiki te Whare.