Ki te Runanga Nui o Niu Tireni.

I tae atu ano te pukapuka a Ngatiraukawa i te tau 1865 ki te Runanga o Poneke, kia whakatuwheratia te ture tutakinga o Ohau atu a puta atu ki Manawatu tae atu ki Rangitikei, kia tukua mai te Kooti Whakawa ki o matou whenua.

Ka puta te kupu a te Runanga kia kotahi tau, kia kore tonu e hohoro te mahi a te Petatone e oti pai, katahi ka tuwhera i te Runanga nga Kooti Whakawa ki o matou whenua.

Heoti ki ta matou mahara atu kua oti i a koutou i runga i ta koutou kupu i ki ai, kia kotahi tau e tatari ana ki ta te Petatone mahi, ka whakarite ai e te Runanga he Kooti Whakawa mo enei whenua tutaki, a kahore matou i mahara, me tuhi atu ano tetehi pukanuka i te tau 1866, katahi ano ka mohio me tuhituhi atu ano koia tenei ka tukua atu ki te Runanga kia whakaaetia mai taua kupu kia tuwhera aua whenua ki te Kooti Whakawa whenua Maori. He tono ta matou ki te Runanga, mahara mai to koutou whare ki ta matou tono. Ka mate matou i te ture kore.