No. 347, 1898 (Mr. Kaihau).
Ki te Honore Tumuaki me nga Mema Honore o te Whare o Raro e noho huihui ana i roto i te Paremete.

Te pitihana a nga tangata Maori o Niu Tireni kua haina nei i o ratou ingoa ki raro nei e whakaatu ana,—

1.	Kua whakaaturia mai ki a motou e nga Niupepa kua paahitia e to koutou Whare Honore te panuitanga tuarua o te Pire Whakanohonoho ki te Tangata Whakahaere hoki i nga Whenua Maori, a kua tukua atu taua Pire ki te Komiti mo nga Mea Maori.
2.	Kei te mohio te iwi Maori ka ata tiakina paitia ano e to koutou Whare Honoze nga mea katoa e pa ana ki nga morehu o te iwi Maori, a e kore rawa e tautokona e koutou nga Pire me nga ture e hanga ana hei mate mo matou.
3.	Kua tirohia e matou a kua ata korerotia mai ano hoki ki a matou te whakarapopototanga o te Pire i tuhatuhaina nei e te Pirimia, a i whai korerotia nei e ia i etahi hui Maori i tu ki nga takiwa o te Motu nei.
4.	Kei te tino whakaae matou kei te tino koa hoki ki te kupu i kiia na me mutu rawa atu te hoko a te Kawanatanga i nga whenua a nga Maori, pera ano me te araitanga i te hoko a nga tangata ra waho i araitia nei i runga i nga tikanga o "Te Ture Kooti Whenua Maori, 1894."
5.	Ka taea taua tikanga te whakarite, ki ta matou whakaaro, mehemea ka hanga e to koutou Whare honore tetahi Pire e whakahau ana kia mutu rawa te hoko a te Kawanatanga i nga whenua Maori.
6.	E tino whakahe ana matou ki era atu tikanga katoa e mau ana i roto i taua Pire, a e tino kaha rawa atu ana ta matou whakahe ki nga mana e tukua ana e taua Pire ki nga Poari whakahaere whenua Maori, ko nga putake i whakahe ai matou koia tenei etahi e whai ake nei: (a.) Ko te mana o o matou whenua, i tuku iho nei i o matou tipuna tae iho ki a matou, i whakapumautia nei ki a matou i raro i te Tiriti o Waitangi, ka murua kinotia atu i a matou i runga i tena Pire, a tona tikanga ka tukuna noatia atu ki te Karauna. (b.) Ko aua Poari ki te mahara iho tena e hangaia i runga i etahi aronga e kore ai e ata taea te whakahaere pai te whakahaere tika ranei o o matou whenua, tona tukunga iho ka pa he mate taumaha rawa ki runga ki a matou, tetahi mate nui whakaharahara, e kore e roa rawa kua kitea te tino hinganga e mate rawa ai e ngaro rawa ai te iwi Maori. (c) I raro i nga tikanga o taua Pire, ka araia atu i te iwi Maori te mana e tukuna nei ki ia tangata e haere maia ai ia e whakawhirinaki ai ia ki a ia ano hei whakaora i a ia, e mohiotia nei koia tena tetahi mea nui e tupu nui ai nga iwi, a i te mea he iwi piri pono te Maori ki te Karauna he iwi i pai tana whakahaere i a ia i nga tau kua huri nei, na reira kaore e tika kia hangaia he tikanga kino e pa motuhake ana ki te iwi Maori anake.

E tono atu ana matou ki to koutou Whare honore kia kaua e paahitia tenei Pire hei ture, a tenei ka tukua e matou enei take kia ata whiriwhiria paitia e koutou: (1.) Me hanga he rahui kia rahi noa atu hei oranga mo nga iwi Maori i roto i nga morehu whenua e toe nei ki nga iwi Maori. (2.) Ko nga Maori kore whenua katoa na nga raupatu a te Kawanatanga na runga ranei i nga hoko whenua a te Kawanatanga i noho kore whenua ai me whakawhiwhi ki etahi wahi whenua o te Karauna e rite ana hei oranga mo ratou. (3) Kua tino tae tenei ki te wa e tika ana kia ata whakaritea te tu o nga iwi Maori ki te tu o nga iwi Pakeha o te Kuini me te whiwhi tahi ki nga painga katoa e tau ana ki nga iwi e ata noho ana e aro nui ana ki te hapai i te ture, e aro nui ana hoki ki te whakamama ake i nga taumahatanga o te koroni.

Na reira ka inoi atu o koutou kai-pitihana ki to koutou Whare honore kia makaia atu ki waho o te Whare te Pire i whakatakotoria atu nei e te Raiti Honore te Pirimia ki te Whare, a kia paahitia tetahi ture hei whakaora i te iwi Maori.

A ka inoi tonu a koutou kai-pitihana.