No. 197, 1898 (Mr. Kaihau).
Ki te Tumuaki me nga Honore Mema o te Whare o Raro e noho huihui ana i roto i Te Paremete o Niu Tireni: Tena koutou.

Ko te pitihana tenei a nga tangata Maori o Niu Tireni kua hainatia nei o ratou ingoa ki raro nei, e whakaatu ara:—

Ko matou ko nga iwi, ko nga hapu, me nga rangatira, tane wahine, e noho ana i te takiwa o te Tai Hauauru, a kua tuhi nei i o matou ingoa ki tenei pitihana, e whakatu pono ana ki to koutou Whare Rangatira i tenei take ka tuhia iho nei e matou, ara: (1.) Kua kite matou i te Pire Poari a te Pirimia me tona Kawanatanga i whakatakoto ai ki nga marae o nga hui a te iwi Maori i o ratou huihuinga. (2.) Kua tino matakitaki o matou whakaaro ki nga tino putake o roto i taua Pire, a he tino nui atu te mate o matou whenua mehemea ka whakaaetia e matou taua Pire kia paahitia, i te mea hoki ko nga wahi papatupu o matou whenua kaore nei ano i taka ki roto i nga ringaringa o te Kooti Whenua Maor ka tino horoia atu te ahua papatuputanga e mau nei ki o matou whenua.

Heoi kau te wahi i kitea iho i roto i nga whakamarama o taua Pire te ahua pai, ko te whakakahoretanga i te Kooti Whenua Maori me te hoko hoki i nga whenua ki te Karauna ki te Pakeha noa iho page 4ranei. Otira ko te wahi i uaua ai te whakaaetanga mo tenei wahi ko te kiinga kia paahi rawa taua Pire Poari katahi ka whakakahoretia taua Kooti Whenua Maori me taua hoko.

Na reira ka ki penei matou: Kaore he wahi o tenei Pire e whakaaetia ana e matou; puta noa nga takiwa katoa o te Tai Hauauru e tino whakahe ana matou ki tenei Pire Poari.