No. 196 (Mr. Kaihau).
Ki a Te Pika me nga Honore Mema e noho hnihui ana i roto i te Whare Paremete.

E whakaatu ana o koutou kai-pitihana:—

Tuatahi.—E whakahe ana matou, tenei iwi Maori o Whanganui me ona rohe katoa, ki te Pire Whakanohonoho whakahaere hoki i nga Whenua Maori a te Kawanatanga, e huri atu nei i o matou whenua ki raro i te mana o te Poari i roto i tana Pire, notemea e tino mohio ana matou e kore rawa e puta he ora ki runga ki o matou morehu whenua i runga i nga tikanga whakahaerenga mokete e whakahaerea ana i raro i taua Pire.

Tuarua.—E tino ki pono ana matou ko matou tonu e tino mate i raro i nga tikanga o taua Pire, notemea ko o matou whenua e rereke atu ana i era atu whenua, notemea hoki ko te ahua o matou whenua e rite ana ki te kotahi hereni me te hikipene mo te eka; ko tona aronga ano tena o te wariu mo o matou whenua. Na reira e kore e kaha ki te whakaea i nga mokete e tau ana ki runga.

Tuatoru.—I runga hoki i nga tino taumahatanga o nga huarahi i whakaritea e taua Pire me utu nga mema o te Poari. Tuarua, ko te moni i namaia. Tuatoru, ko nga moni whangai. Na, e toru enei take hei tino peehi i o matou whenua, e kore ai e tino tuturu ki runga ki nga tikanga o te ora mo te hunga nona te whenua, engari hei tino painga mo nga mema o te Poari. Mo te hunga ake nona te whenua kaore kau he painga.

Tuawha.—Ko te hiahia me te tumanako o te whakaaro e tika ana kia katia nga hoko i tenei taima, i runga ano hoki i te whakaaro o taua Pire. Engari hapainga atu ana o matou whenua ki roto ki te mokete, rahui ai, takoto ai, e kore rawa e taea te unu mai ki waho ma te uru rawa ki roto ki taua ahi whanariki kainga ai, a e wha tekau ma rua nga tau e whakamatautauria ai te oranga mai ranei te matenga atu ranei. He tino mamae nui rawa tenei take, ki runga ki a matou me o matou whenua.

Koia matou ka kii pono atu kaua tenei Pire e pa ki a matou, ki nga iwi e noho atu nei i te Tai Hauauru. Ka inoi tonu ou pai-pitihana.