Ki a Whititera,—

Tena koe. Kua kite au i te korero o te Nupepa o Poneke o nanahi, e ki ana he tangata waha nui au ki te korero pupuru whenua, e ka tu au ki te aroaro o te iwi katoa kia noho au ki raro ka haere atu ki nga kai hoko whenua ka mea atu au he waha kau taku, kei te tuku ano au i te whenua. Ka hoha au ki te utu i tenei korero whakapaeteka. Kei runga tonu au i te uaua, i te maro, i te kaha i te tohe tonu ki te pupuru whenua, matou tahi ko taku iwi, kaore rawa i puta i au tetehi kupu whakangawari kia tukua te whenua.

Kua kite hoki au i tetehi kupu o taua Nupepa e ki ana kaore he whenua o Parakaia i roto i taua whenua e tautohea nei, e rua tonu eka.

Ka utua e au tenei kupu he whenua nui noa atu te whenua o Parakaia ratou ko tona iwi, tera ano e, kitea ka whakama pea te tangata nana tenei kupu. Kore rawa tetehi kia kotahi o te iwi o Parakaia i te tuku whenua, no Parakaia ake ano nui atu pea i te rua mano eka. Heoti ano.