Ki Te Runanga,—

Ko te kupu pupuri tena i ki nui atu ai kia te Petatone, te tuatahi, ko tenei taha o Rangitikei i puritia e au i te ringaringa o Kawana Kerei, o te Makarini, ara o Ngatiapa, a whakaotia atu e au ko tera taha ki tera Kawana, muri iho ko Kawana Paraone, ka tohe ano ki Rangitikei, ki Manawatu, whakaaetia ana e au, ko te Awahou, ko te Ahuoturanga, kua rite nga hiahia o nga iwi nei, ki tenei Kawana, ki tera Kawana kua mutu te hiahia hoko whenua ki a te Kuini: ko toku manawa tenei e tohia nei e koe, he pupuri anake te kupu e man nei, kaore e pai kia hoatu tenei wahi iti ki a koe, ko te kupu tonu tena a Ngatiraukawa ki a te Petatone, i te rima o Aperira: ko te tuatoru o nga kupu, ma te Kooti whakawa anake ka marama ai tenei whenua, ko tenei te mea e taria nei e matou, no te tekau ma wha o nga ra ka utua e te Petatone, i marama ano ana kupu korero ki nga iwi e wha, ko tana whakataunga i te he kia matou, he kupu hou: e waru rau o Wanganui, e rua rau o Ngatiapa, ko Rangitane, ko Muaupoko, kotahi rau, ko kouton e Ngatiraukawa he hawhe, he iti, tetahi kupu a te Petatone, i haere tahi matou ko enei iwi ki te whawhai ki nga iwi tutu i runga i te mana o Te Kuini, kua whakaae ratou me hoko, kua pai au ki ta ratou, kei taku ringa tenei whenua e mau ana, na, whakahengia ana e matou ana kupu, he muru Maori tau i to matou whenua, kaore nga waru rau o Whanganui i tenei hui, ka whakahua kau koe i te kupu taurangi hei whakawehiwehi, ka mea ia heoi ano kua oti ka hoatu i au te moni ki te tuku whenua, ka ki atu matou ka he ka puritia e au toku ake whenua ekore au e tango i to moni penei tonu to kupu a nga tangata katoa.