Copy of a Letter, from Mohi Mahi and others to His Honor I. E. Featherston.

E koro Tena ra koe, me to Runanga katoa, kia rongo mai koe kua hinga nga pou roherohe a te Hauhau a Parakaia te Pouepa i runga i te whenua i tukuna paitia e matou ki a koe, ara o nga iwi katoa, no te whitu o nga ra o Heptema, 1866, i te tekau o nga haora, ka tikina e tetahi tino kaumatua o Ngatiapa nga pou a Parakaia me te Hauhau i runga i to matou whenua kua riro nei i a koe, ko aua pou i unuhia paitia e matou, i taua ra ano i te tekau matahi o nga haora, ka tutaki (ki a) a Wiremu Pukapuka a Nepia Taratoa me te Hauhau me te Pakeha e wea ana i runga i taua whenua, ka tangohia e Wiremu Pukapuka te tini i a Nepia Taratoa, muri iho ka whakahokia atu e Wiremu te tini kia Nepia me te Hauhau, ko taua iwi Hauhau e rua tekau, mehemea ko taua tino kaumatua nei ko Wiremu Mokomoko i kite i a Nepia Taratoa me te Hauhau, anei kua riro mai te tini i a ia.

E koro kia rongo mai koe, he pokanoa te mahi a Parakaia no te mea ko tona arero he arero teka, me tona ringaringa matau rite tahi ki tona arero. E koro, kia rongo mai koe, me to Runanga, ko te ringa maui o Parakaia kei te mohiotia mai e koe me te Runanga ko tona ringaringa matau, me ana whakaaro kei te Hauhau. E koro, tukua mai tetahi whakaatu kia matou mo tena reta ka tukua atu nei e matou kia koe.