Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Correspondence Relative to the Manawatu Block

Copy of a Letter from Tamihana Whareakaka to His Honor I. E.Featherston

Copy of a Letter from Tamihana Whareakaka to His Honor I. E.Featherston.

Maramaihoea Wahi o Rangitikei,

9 Hepetema, 1866.

Ki a te Petatone (Huparitene),—

E koro Tena koe—He kupu atu tena naku kia koutou ko tou Runanga, ko te mahi a Parakaia te Pouepa kua tu, ko te tu ra tenei kua roherohe i Rangitikei, puta noa ki Oroua tae noa ki ona wahi katoa, ko matou me Ngatiapa kua tu ki te unuunu i nga pou a Parakaia raua ko Nepia Taratoa, i to maua taenga mai ko Te Wiremu Pukapuka ka kite maua ia Nepia ratou ko ona hoa me ta ratou Pakeha wea, e wea ana i roto i o matou kainga e to ana i tana tini, katahi ka tangohia te tini a taua Pakeha ratou ko aua Maori ko Nepia ma.

E koro, kia rongo mai koe, ko te ingoa o taua Pakeha (ko Iui) tautohe tonu iho matou ko Nepia, katahi ka ki atu a Te Wiremu Pukapuka ki taua Pakeha me hoki koe kaua koe e haere mai ki konei whakararuraru ai, engari kaore a maua kupu kino mo taua Pakeha, i whakahoki pai ano maua i taua Pakeha, ko te take o ta maua whakahoki i taua Pakeha, he pokanoa nona ki te ruri i runga i te whenua kua hoatu e nga iwi e toru, e Ngatiraukawa e Ngatiapa, e Rangitane, kua hoatu pono ki tou ringaringa—Otira ehara i a ia te he, tana he ko te whakarongo ki nga kupu a Nepia raua ko Parakaia.

E koro, kia rongo mai ano koe, e tae atu taua Pakeha na ki kona korero ai he kupu kino a maua mona, he tito—kei whakarongo koutou ko tau Runanga ki nga korero a tena Pakeha—I te mutunga o te whakahoki i taua Pakeha, katahi ka haere ki nga Pakeha o Rangitikei nei tito ai he kupu kino ano a maua mona—E koro katahi ano te Pakeha tito rawa, ko wai te tangata o kaha ki te hoatu kupu kino mo tena Pakeha—kia rongo mai koe ki te kupu a taua Pakeha, he mea tuku mai ia na to Koroni o Niu Tireni, ki te mahi i te papa whenua i tukua atu nei e matou ki tou ringaringa—E koro, ko Parakaia ano te kai akiaki ki te Hauhau, ko tenei tangata ko Parakaia hei whakakino—no te mea kua uru ia ki te Hauhau, no te mea nana ano tenei mahi e mahi nei te pupuru whenua.

Heoi ano na tou hoa pono,

Na Tamihana Whareakaka.