I timata te hui o nga hapu me nga rangatira me nga mema i pootitia mo te runanga nui o te Paremata Maori i te 6 o nga ra o Hune, 1892, tae noa ki te 14 o nga ra o taua marama, heoi kahore i rupeke mai nga hapu o te iwi Maori o Aotearoa i te tomuri o te taenga atu o nga panui. Heoi i muri i te 14 o nga ra o Hune kai te haere tonu mai nga tangata o nga hapu o te iwi Maori tae noa mai ki tenei ra. Heoi i te mea i whakaritea e te hui i tu ki Waitangi i te 14 o nga ra o Aperira, 1892, me tuhera nga take korero ki nga hapu o te iwi Maori me e ratou Rangatira me o ratou mema i te 14 o nga ra o Hune, 1892, kihai i taea te tatari atu ki nga hapu e ngaro ana i te marae i taua ra. Ko nga hapu i ngaro atu ko te Urewera ko Ngatiawa ki Opotiki me ona Rohe, ko te Aupouri, ko Waikato i Whatiwhatihoe, i Karakariki, Maungakawa, Pukekawa, Te Hoeatainui, tae atu ki Waiheke. No muri i te 14 o nga ra o Hune ka tae mai etahi o nga mema o etahi oaua takiwa. I te 14 o nga ra o Hune 2 p.m. Ka hui nga hapu, nga rangatira me nga mema hoki i tae mai ki te marae. Ki te wahi kotahi noho ai te roro o nga whare. Ki te whakaaro iho e tata ana pea ki te mano nga tane nga wahine haunga nga tama-riki. Ka tu te Pana a Meiha Keepa i tetahi wahi e toru tini pea te pa mamao atu i te marae, ka tu nga rangatira i muri i taua pana o Heretaunga o Wairarapa me etahi wahi ki te mau i te Haki o te Tiriti o Waitangi, me te pukapuka i haina ai nga rangatira Maori o Niu Tireni. Ki te Tiriti o Wai-tangi me te Paipera a Te Atua ka timata te whakahau kia haere ki waenganui i te marae, i reira te pou o te Haki e tu ana. Ka timata te whakatangi a te Pana Maori koia tenei te waiata o taua pana (National Anthem) tika tonu te haere o te pana me te iwi nui tae noa ki te pou o te haki katahi ka herea te haki o te Tiriti o Waitangi. Ka mutu ka tu te kai huti i te haki i te taha o te pou, ka tatari kia mutu te karakia. Ko te Rev. Hoani Piwaka te minita nana i Karakia, ka mutu te Karakia ka tu a H. Tomoana te Tiamana o te Komiti o te marae ki te panui ite mihi a nga hapu o te Tairawhiti, me nga take o tenei hui i karangatia ai kia tu ki te Waipatu wahi o Heretaunga. Koia tenei nga kupu o taua mihi.