No. 273.Deed of Sale.£6000.Ngaitahu and Ngatimamoe.Ceding claims to Stewart's Island.Executed29th June, 1864.Tenei pukapuka i tuhituhia i tenei rua tekau ma iwa o nga ra o Hune i to tau o te tatou Ariki, 1864, he pukapuka tino hoko, tino hoatu, tino tuku wakaoti atu na matou na nga Rangatira me nga tangata o Ngaitahu o Ngatimamoe no ratou nga ingoa e mau i raro nei a hei wakaatu tenei pukapuka, mo matou, mo o matou whanaunga me o matou uri mo te tuhituhinga o o matou ingoa ki tenei pukapuka i raro i te ra e whiti nei kua whakarerea rawatia atu ki a Wikitoria Kuini o Ingarani ki ona uri ki nga Kingi ki nga Kuini o muri iho i aia me ana me a ratou e whakarite ai hei whakaritenga mo nga pauna moni e Ono Mano (£6000) kua utua mai ki a matou e (Henry Tacy Clarke) mo te Kuini a e whakaaetia nei e matou te rironga mai o aua moni ko taua wahi whenua katoa ko Rakiura he Moutere ko te mapi hoki o taua whenua kua apititia ki tenei, ko te tukunga o nga utu mo tenei whenua koia tenei Erua mano (£2000) kua utua mai ki a matou i tenei ra, Erua mano pauna kua waiho kia te Kawana pupuri ai, a mana e apiti mai i roto i te tau nga pauna moni e waru mo te rau kotahi huihui katoa nga moni apiti i roto i te tau kotahi, kotahi rau e ono tekau pauna (£160), ko enei moni me wakaputa i nga tau katoa me wehewehe ki a Paitu, kia Teoni Topi Patuki, ki a Teoni Kihau, kia Frederick Kihau, kia Ellen Kihau ki o ratou uri i muri i a ratou, a ki te he katoa enei ma te Kawana e wakarite he tukunga iho mo enei moni. Erua mano Pauna (£2000) kua waiho ki a te Kawana mana e whakarite aua moni hei hoko i etahi whenua ki te takiwa o Murihiku hei whenua mau tonu mo nga Kura me era atu mea e whiwhi ai enei iwi i te pai. Ko te whenua kua tukua nei ko Rakiura katoa, me ona wai me ona awa nui, me ona roto, me ona awa ririki, me nga mea katoa o taua whenua, me nga motu nunui, me nga motu ririki e tutata ana ki taua whenua, me o matou tikanga, me o matou take me o matou paanga katoatanga ki taua wahi, kia mau tonu kia Kuini Wikitoria ki ana uri, ki ana ranei i wakarite ai hei tino mau tonu ake tonu atu. Ko nga whenua ka whakahokia mai hei whenua mau tonu mo matou me o matou uri koia enei (1) ko te tuatahi kei Potapa (Lord's Harbour) e toru tekau eka, ko te tua rua (2) kei Potiweta (Port Adventure) e toru rau e toru te kau eka (3) ko te tuatoru ko nga whenua katoa, i te Neke (Neck) kahore i riro tika i te pakeha i mua ka waiho enei mo nga hawe kaihe e noho ana i te Neke (Neck) ki te tu katoa nga hawe kaihe i taua whenua ma Ihaia Whaitiri raua ko Hoani Tumarere te toenga, ko te tua wha (4) ko te whenua ki te motu o Ohekia (Paterson's Inlet) kia wha rau eka me tango mai i roto i te takiwa o te mira kani rakau tawhito, i te mira kani rakau hou a Puroka (Bullock), (5) ko te tuarima ko te kurae ki te taha ki te nota o Horse Shoe Bay kia wha te kau eka, (6) ko te tua ona kei Cultivation Point, Port William kia waru tekau eka, (7) ko te tua whitu kei Raketi awa (Raggedy River) kia rima tekau eka, (8) ko te tua waru kei Mitini motu (9) kei Toparetutai, kia rima eka. Me nga motu titi, ko Horomamae, ko te Wharepuaitaha, ko Kaihuka, ko Potuatua ko te Pomatakiarehua, ko Tia, ko Taukiepa, ko Rerewhakaupoko, ko Moki iti, ko Moki nui, ko Timore, ko Kaimohu, ko Huirapa, ko Taketu, ko Heretatua, ko te Pukeotakohe, ko Tamai o te Mioka, ko Pohowaiti, ko Poutama, Herekopare, Pikomamaku, ko enei whenua mo matou, Otiia ma te Kawana e tiaki e whakahaere nga tikanga, (kua oti hoki te pani ki te ahua pua kowhai i roto i te mapi, apiti ki tenei pukapuka) a hei tohu mo to matou whakaaetanga ki nga tikaka katoa o tenei pukapuka kua tuhituhia nei o matou ingoa me o page 391matou tohu, a hei tohu hoki mo te whakaaetanga o te Kuini o Ingarani mo tana wahi ki nga tikanga katoa o tenei pukapuka, kua tuhia nei te ingoa o Henry Tacy Clarke, kai whakarite whenua.