Deed of Sale £2,400 0s. 0d. Ngaitahu Tribe. Otakou Purchase.Dated 31st July, 1844.Kia Mohio nga tangata katoa ki tenei pukapuka ko matou ko nga rangatira me nga tangata o Ngaitahu i Niu Tireni kua tuhia nei o matou ingoa ki raro, ka whakaae i tenei rangi i te toru tekau ma tahi o nga rangi o Hurao i te tau o to tatou Ariki Kotahi mano e warn rau e wha te kau ma wha; kia tukua, kia hokoa; kia whakamahuetia rawatia mo Wiremu Wekepiri (William Wakefield) te kai mahi o te whakaminenga o Niu Tireni i Ranana mo nga Kai whakarite o taua whakaminenga, o matou wahi katoa to matou apa katoa, i roto i nga whenua, i roto i nga rohe kua tuhia nei ki raro, ko nga ingoa o aua wenua ko Otakou, ko Kaikarae, ko Taieri, ko Mataau, ko te Karoro, ko nga rohe enei, ka timata te rohe whakararo i Porehurehu, haere tonu i tawahi whakawhiti atu ki tawahi o te ngutu awa o Otakou, ki Otupa, haere tonu i tatahi a Poatiri, ko te taha ki te haurawaho ko te moana nui haere tonu i Poatiri, a Tokata ko te taha toka; ka haere tonu i reira a runga i te hiwi i Taukohu, a Pohueroa, haere tonu i runga i te hiwi i Kaihiku, whakawhiti ki tawahi o Mataau, haere tonu i runga i te hiwi o Maunga-atua, a i runga i Wakaari a i runga i Mihiwaka i te hiwi a Otuwareroa, a heke noa ki tatahi ki Purehurehu, me nga moutere katoa hoki, ka tukua e matou a Tamautaurua a Rakiriri, a Okaihu, a Moturata, Paparoa, a Matoketoke, a Hakini-kini, a Aonui; tenei hoki nga wahi whenua kua purutia e matou mo matou, mo o matou tamariki, ko tetahi wahi whenua i te taha Whakawaho o Otakou ko Omate te ingoa, ka timata te rohe i Moepuku, wakawhiti atu ki Poatiri, haere tonu i tatahi a te Waiwhakaheke ka whakawhiti i reira ki Pukekura, haere i tatahi a Moepuku, ko tetahi wahi whenua hoki kei Pukekura kotahi pea te eka o roto kua pona ki te pou, ko te tahi wahi whenua hoki ki Taieri; ka timata te rohe i Onumia; tika tonu te rohe a Maitapapa ko te awa o Taieri hoki te rohe o tetahi taha, ko tetahi wahi kei te Karoro, ko te Karoro te rohe ki runga, ko te moana nui te rohe Whakawaho; ko te rohe Whakararo kei te kainga, a kia kotahi te maero o te rohe whakauta, ko enei wahi kua rahuitia e matou, e kore e hokoa, e retia ki tetahi tangata atu kia whakaae ia ano te Kawana o Niu Tireni.