Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

He Pukapuka Whakaatu I Nga Tikanga A Te Pakeha E Nohoia Paitia Nei Te Whenua E Ratou Whaka-Pakeha

Upoko IV. — Ko te Ohaki

Upoko IV.
Ko te Ohaki.

1.Ko tetahi mea pai o te tuhituhi i paingia rawatia ai e te Pakeha, ma reira e mana ai nga Ohaki a nga tangata kua mate.

Ko ta te Pakeha tikanga mo ona kainga, mo ona taonga, i te mea ano e ora ana te tangata ka tuhituhia tana Ohaki; he mohio hoki tona, ekore ia e matau ki te wa e mate ai. Koia i mea ai me hohoro te whakaatu i tana i pai ai ki ona uri, ki nga tangata i muri i a ia, kei waiho ona taonga hei take tautohetohenga ma ratou.

page 10
2.Ehara i te mea mo nga wahi whenua anake tenei tikanga, engari mo nga taonga katoa, mo nga moni, mo nga aha, mo nga aha. Me whakaatu hoki tana i pai ai mo te tuwhatuwha i ana moni, hei mea e ora ai te pouaru nga tamariki, nga tangata ranei i tata ki a ia. Me whakaatu ano he tangata hei whakamana i ana kupu: a ki te mea he moni a tetahi tangata i a ia, ma aua tangata ano e tango i tetahi wahi o ana moni a ka hoatu hei utu, a rite katoa. A ki te mea he moni ana kei te tangata ke, ma aua tangata e tiki e kohikohi. Katahi ka tuwhatuwhaina ki nga tangata i kiia ra e ia ma ratou.
3.Ko nga tuhituhinga nei ka peratia me nga pukapuka tuku whenua: ko te ingoa o te tangata nana te Ohaki hei te mutunga; a ka karangatia etahi tangata tika hei titiro i tana tuhituhinga. Kaua e neke iho i te tokorua nga tangata e karangatia, a me titiro tahi, a me tuhituhi ano o raua ingoa ki te taha o te pukapuka; me tuhituhi e raua i te aroaro o te tangata nana te Ohaki. Heoi he titiro kau ta raua mahi, hei mea e tuturu ai tana Ohaki i muri i a ia, hei mea e mohiotia ai nana ake. Ko ta raua e titiro ai ko tana tuhituhinga i tona ingoa. Hei aha ake ma raua te roanga o nga korero?
4.Ko te pukapuka penei, rere ke ana tona tikanga i to te pukapuka tuku whenua, reti ranei. Ko era, he mea hohoro te mana. Te tino whakaaetanga a nga tangata, te utunga mai i nga moni, te tino tuhituhinga—na, kua rite. Heoi ano. Kahore e whakaputaina ketia e te tangata nana i tuku, i reti ranei. Engari, ko tenei, ekore e hohoro te mana; ehara hoki i te mea whakaae mai na nga tangata tokorua. Engari na te tangata kotahi anake tenei ki, hei Ohaki mana, ina mate. I a ia ano e ora ana, ekore e mana tana kupu. No te mea kei a ia ano te tikanga, a mana ano e whakakahore tana i tuhituhi ai, mana e whakaputa ke ranei. page 11

Titiro hoki—ko tetahi kainga kua kiia i roto i te pukapuka hei waiho atu mo Mea. Muri iho ka mea te ngakau o te tangata ko taua kainga kia hokona, kia retia ranei; e pai ana, me hoko, me reti ranei. Nona ake ano tona kainga. Ko tana i tuhituhi ai, kahore ano i mana oa, i a ia e ora ana.

Tetahi, ko te tangata ranei i kiia mona tetahi kainga, i muri iho ka mate, ka kitea ranei tetahi take e kore ai e tika mona taua kainga, a, me whakaputa ke te tuhituhi i to mua.

5.Otiia ki te mea te tangata ko tana i tuhituhi ai i mua kia whakariroia ketia, me pera tonu me to te timatanga. Kia tokorua mai ano nga tangata hei titiro, hei tuhituhi ano i o raua ingoa, e kore ai e mana te tuhinga tuatahi, e mana ai tenei.
6.Ahakoa tika noa te tuhinga a te tangata nana te Ohaki, a nga tangata titiro ano hoki, tenei ano tetahi take e he ai: ki te marenatia te tangata, kua kore taua tuhituhinga e mana Engari me tuhituhi hou ano, me whakaaro hoki ki tana hoa, kia whaitaonga ai, ina mate ia.
7.Na, ka mate te tangata, nana te Ohaki, katahi ka tino mana tana kupu. A i te ra e tanumia ai, e huihui ai nga whanaunga, nga tangata i tata ki a ia, ka whakakitea mai te pukapuka o te Ohaki, a ka panuitia ki a ratou.
8.A ki te kore e tino marama nga kupu o te Ohaki, a ka tupu he tautohetohe i muri iho, ka waiho ma nga Kai-whakarite e ata whakamarama, e whakarite.