page lxxxiii

No. 9.^* Ko te Wehe ki te Wai.

Me he mea, ka aroha he tangata ki tetehi wahine, he wahine ranei ki tetehi tangata, e nui rawa ana tona mate i te aroha.

Ka rapua tetehi tino tohunga mohio, hei wehe i tona aroha, kia mauru ai. Ka tae mai te tohunga ki taua tangata e mate ra i te aroha. Ka haere raua ki te taha o te wai, me tetehi kokowai ki te ringa o te tohunga, ka tango in ki tetehi wahi hinu, ki tetehi wahi wai. Ka konatua te kokowai ki te hinu, me to wai, ka mukumukua ki ona ringa, ka miria atu ki te kanohi o te tangata e aroha ana, ki te uma hoki. I te komukumukunga o te wai, o te hinu ki te kokowai, he kupu karakia ano i reira. Me te murunga ki te kanohi, me te uma, he kupu karakia ano i reira, ka mutu. Ka tango ia ki tana tira, (tira he toko na te tohunga he mea whawhati mai i te rakau mata), ka tu nga puke, he mea ahu ano nga onepu, e nga ringaringa o te tohunga, ki te akau o te wai, ka tu nga waewae o te tangata ki runga i nga puke, ka patu te tino tohunga i te wai, me te karakia wehe ano, i tona aroha kia mauru ai.