Ko Nga Moteatea, Me Nga Hakirara O Nga Maori
No. 8. * Ko nga Wai Marie.*
No. 8. * Ko nga Wai Marie.*
Ka haere ki te taua ka toa, ka mate te parekura, te pa horo, te whakaara, ko te whiwhi i te taurekareka, i te taonga, i te rawa ranei o te pa horo, o te parekura, patu whakaara.
Ko te ora, kaore e hia i te haerenga, i te tu ngarahu ranei ina haere i te ara, tu ngarahu, haere taua ranei.
Ko te oranga i te pa horo, i te parekura, i te whakaara, i te waka tahuri, i te whare wera.
Ko te oranga i te rakau hinga, whenukutanga.
Ko te oranga i te mate turoro, i te whaiwhaia, i te makutu, i te hangarau, i te taurarua, i te raweoi, i te kanakana. I te ora i te hinga noa, i te mate noa, i te paheke, i te tutuki, i te tapoko, i te tu o te wae', o te ringa', o te kiri, o te ngutu, o te kanohi.
Ko te ora, kaore e motu, e tu ranei te ihu, te kanohi, nga ngutu, nga ringa, nga wae', te kiri, ko te oranga i nga mate katoa, i nga aha, i nga aha.
Ko te tupu o nga kai, taro, kumara, hue.
Ko te tini o nga ika, o nga kupenga, matau hoki.
Ko te waka ora i te kai, i te hau ina hoe, kaore e tahuri te waka, e paea, e pakaru.
Ko te hoe ora kaore e whati, e mahue, e makere, e riro.
k
* Ko nga mea papai, nga wai marie, no te ao era.
Ko nga mea kikino, nga aitua, no te po era mea ki[gap — reason: unclear]uo.
Ko te tata ora i te pakaru, i te whati, kaore e mahue, e riro.
Ko te kaitaonga, whiwhi i te kaitaonga.
Ko te tira e kore e rokohanga e te hau, e te ua, e te po ki te ara.
Ko te waka e kore e rokohanga e te hau, e te ua, e te po ki te moana.
Ko te waka e kore e riro i te hau, i te tangata.
Ko te tira ora i te kai, i te mahana, waka ranei i te kai, i te mahana.
Ko te waka whiwhi i te utanga, ki te taonga, whenua ranei ina utua.
Ko te tangata kakama ki te mahi kai, waka, whare, kainga, aha, aha.
Ko te toki ora i te whati ina tua waka, waerenga, hahau rakau mo te whare, mo te kainga ranei.
Ko te rakau e kore e whati, e pakaru ranei ina tuaina.
Ko te whenua e kore e riro, e tangohia, e tahaetia, e kohia ranei.
Ko te kainga e kore e pakaru i te hau, i te tangata ranei.
Ko te whare e kore e tahaetia, e pakarutia ranei e te kuri, e te tangata.
Ko te tangata toa ki te riri, ki te hopu tupapaku, whakahoki puta-taua, ki te whai korero, pumahara mo te riri, mo te mahi.
Ko te tangata he, mou i te pa horo, parekura, whakaara ranei.
Ko te tangata whiwhi i te wahine, whanau tama.
Ko te wahine whatu weruweru raranga kete, taka kai raranga whariki, whanau tamariki, moe tane ranei.