page lxxix

No. 7. ^* Ko nga Aitua.

Ko te hinga noa, ko te mate noa, ko te tutuki, ko te paheke, ko to tapoko, ko te hirawea.

Ko te tu o te tinana i te rakau, o te ringa hoki, o te kanohi.

Ko te motu o nga ringa i te pipi, i te toetoe.

Ko te pura o te kanohi.

Ko te piri noa mai o te mate anini, whewhe, kiri ka, aha, aha noa iho.

Ko te hoki kau i te haerenga ki te kaitaonga, rapunga ranei.

Ko te haerenga ki te tuku kupenga, hoki kau mai, ki te hi ika ranei, ko te haerenga ki te tahere manu, hoki kau mai, tawhiti kiore ranei, papaki kaka, hoki kau mai.

Ko te haerenga ki te tua waka, ki te hahau ranei, whati ana, pakaru ana ranei, ko te wareware tangata ranei.

Ko te waka tahuri i te moana, paea ranei i te hau, ko te hoe whati, makere ranei ki uta, ki te wai ranei.

Ko te tira rokohanga e te hau, e te ua ranei, e te mate, e te huka ranei ki te ara, ki te moana ranei.

Ko te waerenga puwhenua, kai kore ranei, ko te mara weto, kai kore ranei, o nga kumara, hue ranei.

Ko te raukura, pohoi makere ranei, i te tunga ki te whai korero, ko te pueru makere, motu ranei i te tunga ki te taki.

page lxxx

Ko te maipi whati, pakaru ranei i te whawhaitanga, ko te whati noa i te hoa riri, ina whawhai, ko te rakau tu kiko, a mate noa iho.

Ko te toki whati ina tua waerenga, hahau waka, tarai rakau whare.

Ko te tata waka ina pakaru i te tainga wai, i te tarainga ranei.

Ko te kainga pakaru i te hau, i te tangata ranei.

Ko te whare pakaru i te hau, i te kuri, i te tangata ranei.

Ko nga taonga riro i te whanako.

Ko te taua hoki kau kaore i whai patunga, i whai taonga, ko te hoki kau, kaore i hopu taurekareka, i whai taonga ranei o nga parekura, whakaara, pa horo ranei.

Ko te korapa, ko te hauhauaitu, hinapo, korapa, arohea, pawera whaki o te kai.

Ko te kowhiti, ko te mata tu o te moe i te po.

Ko te punehunehu, pakoko ranei o nga, ngutu, o te kanohi, ina haere ki te taua, ki te aha, ki te aha.

Ko te kohi kiko, kai uaua ranei.

Ko te whakarapa ki nga haere taua, haere kaitaonga, haere tono taonga, haere whakataka tangata ki te taua, ki te mahi kai, ki te mahi whare, waka.

Ko te pakukore ki te whatu pakikau, raranga kete, te tao kai mata i te hangi, wera i te ahi.

Ko te potiki kore, mate ranei, ko te wahine kore tane, ko te rawa kore.