He Tangi, mo Hori Kerei, na tona hoa. ^*

Tirohia mai ra,
Nga huihui o Matariki,
O Puanga, Tautoru,
Ka ngaro a Atutahi,
Mana e whakarewa te ika wheturiki,
Ka rewa kei runga,
Puhia e te hau,
Ki runga o Mangere
Ka ngaro ia i te rehu tai,
Tena e te iwi,
Taku kura-tangi-whakaingoingo
Te whakaangi atu na,
Waiho kia haere,
He toroa awe nui e topa ana ia ki te muri,
Unuhia noatia,
Taku hou kotuku no runga rawa, no te pae tauarai
Ki a Ihu Karaiti
E hara i te tangata,
He kuru tonga rerewa, ka tahi ka unuhia
I roto i te whare o Kawana,
I tirohia ano, ka hiko te uira ki runga o Taupiri,
Ki tou tini ra, e moe mai ra nga mania kei Tangirau,
Ko te matamata i torona atu,
Mo koutou ko potiki e moe mai na e pa.