HE PANA, NA RARO.

Turou, turou whakataha,
E tapu taku upoko he puna wahine na Rangi a Kahu,
Tuhoro-matakaka ko te pu o te hue i tupu mai ai,
Ka toro te kawai makere te whakatawa,
Ko ratou ra kiano i patete te Taitapu ki Parinui,
Kia whakarongo mai te tini o Manahua i Motutapu,
I te awhenga ra i Kaiweka, i Mokoia ra,
Ka noa au e kaiure,
Ka noa au, ka noa au he peka ano no taku tupuna,
No Hinepito, no Rangiwhakapirikura,
Ko te kura i ’hea,
Ko te kura i hoki mai ai Tuhourangi,
Ki tona whenua ha,
Amioa, amioa ko te rua o nga hokinga mai,
Hoki rawa mai ka kuraruraru, ka pohehe,
He tiki hou hoki te tiki,
He kura hou hoki te kura,
A he topuni hou hoki te tarawa,

page 411

He aha te kupu ka tito mai ai ki a hau,
Akiaki noa, akiaki noa ki kore, ki kore ha,
Kaore aku peka e te iwi ki te kainga,
He rau nunui mai no runga no Paengaroa,
Tapotu ki Rotorua ki Hakaipuku,
Kei Manukaroa te whare awheawhe,
O nga pakeke e noho mai te kongutu awa,
I Utuhina noku ano,
Ngongotaha noku ano,
A Whetenga noku ano,
A Horohoro noku ano,
Te Whakamaru noku ano,
A Maroa noku ano,
Tutukau noku ano,
A Paeroa noku ano,
Noku anake ano,
No taku tupuna no Hine-aupounamu,
Kowharawhara piri noa iho ano,
E taoi ki te tango i taku ure,
Ina taku tena,
Na taku toa i puta mai ai Urua-te-ao,
I horo ai a Titaka, i mate ai a Tunoke, i mahue ai,
Tou whenua, aha, aha, ina taku toa na.