page 317

HE TANGI.

Takiri mai ra te whetu o te rangi,
Ka papa nga hoe i te rahi ’Ati Kura,
I te waka hoehoe ki roto Papanui,
E manu kau ana te parera i te wai,
He aha kei au me he ika kohuki,
To mata i haea ki te uhi tongarewa,
Ki te toroa tai no runga i nga whanga,
E kai ana au te uru whakamatara,
Nou e Takarangi ki whakarerea iho,
Te whatu o Uenuku na runga ana mai,
Te tara ki Whakaahu kei raro iti iho,
To kiri whakaheke ki te ata kahurangi,
E tama tu mua te hoki ki muri ra,
Kia turakina atu te kopa o Whakawhiti,
He taonga ruru tonu i to matua ra,
He kirikiri paura no Rarotane ra,
To kiri rau iti ka popo i te ahi,
Ki roto Kaitoki he kawau whakaruku,
No nga tahuna i waho o Punawheko,
E hara koe e tama he tau whakahiapo,
E whakarawhaki ana nga tai o te rae,
O Mihirau ra e ki te iwi ana ra,
E anga to mata ki runga o Ahutiti,
Ma to tuahine mana koe e kite,
E tama ki a au na, i.