page 230

HE WAIATA, KAI KORE, NA TE WHAWHANGA.

Kaore hoki te huhua kore noa ki te mahi,
Ko te kore toki hei tuatua, hei heu mai,
Ka tahi nei te uri o Te Urewhakarau,
I tua noa ra i tana waerenga i Punaromia,
Hoake rawa nei nga karere ki a Te Rotokohu,
E ki ana mai kei whea koki au purapura i mahi ai koe,
Ka mate i te whakama, ka rapu noa te mahara,
He oti ano te whakahinga, ki Orangimaki,
Kei Paemako te pou turuturu o te purapura,
E rua tekau tanga o te kete, ka kitea i reira;
Te wahanga taiki ki nga mokai i whakaraua noatia,
Ki nga tahataha tau mai Pukenga,
Ki te kowhiti i o rua pukeko,
I ngaro ai ko te kai,
Ko te heke ra o Maruiwi, toremi ai ki raro ra,
Hei aha koa te kore ai taku iwi,
E mau ana mai te mahi kai;
I au ra e rehua mai nei e te umu o te kai,
E noho kotahi nei tona motu, koia anake,
Kauaka te manuhiri e tapeka mai ki konei,
Kei tomo noa ki te whare, kei kai i te ketekete,
Kei whakapuhana kau aku mahara, ki te whakahau,
He aha he takunetanga e puta ai ki waho ra,
I whakamanawatia ki te tau, ka ai he huanga ki nga pahi,
He marae kino mataotao,
He kai kore i au e.