page 205

HE WAIATA POPO NA TE HAKEKE.

Kati, e tama, te noho i to whare,
E puta ki waho ra, ka haere taua,
Nga matarae, i waho Whakaari,
Kia uiui mai, ’Ko wai to ingoa ?
Mau e ki atu, Ko Te Rara-o-te-rangi,
Kei ki mai, te wareware,
Ka pau te whakanoa, e te tini, e te mano,
Moku ianei, mo te kahui pepeke,
Te roa Wairerewha,
Kei whea to tupuna ?
Kia whakaputa mai,
I muri ano whakatau-potiki,
Nana i toko te rangi, i runga nei,
Ka puta koe, ki te ao marama.
Hikaka te haere, ki runga Taikoria,
Pukana o karu, ki roto Manawatu,
Kia powhiri mai, koia i to whaea,
E Rau a Te Waka, ki’paoa, to rangi,
Te rau o te huia, he noa te tinana,
Tenei to piki, he hokioi i runga,
Nga manu hunahuna,
Kahore i kitea e te tini, e te mano,
Kia takaro koe, nga takutai,
E takoto, i waho Waiwiri, i roto Waikawa,
Ka eke koe, ki runga o Pukehou,
Ka whakamau, e tama, ki waho Raukawa,
Ko nga moana ra, e whakawhana noa ra,
O Tupuna, i te kakau o te hoe,
Ngaro rawa atu ki Hawaiki.