page 125

HE TANGI MO PAPAKA NA TE HEUHEU.

Taku tirotiro noa, i taku hono tatai. Ka wehe koe i a au,
Te mu a te tini, te wenerau a te mano,
Taku manu tioriori,
Mo nga hau kopanga-rua, ki te tonga;
Ko Te Tupe-o-tu, ko Te Hau-te-horo, ka whakairi te toa.

Rangatu atu ra,
Nga titihatanga i roto Pa-Hiko,
He kauterenga nui
Na koutou, nga taumata i te Horo.
E whakamakuru ana,
Ko aitua tonu, Ko Tiki raua ko te Toa,
Ko Whana-ihu, raua ko Whana-rae, ko te tama i aitia
E tera wahine, e tera tangata,
E whakatutuki ana,
I nga waitete, a Tu-matauenga;

Taku whatiwhati ki, ka riro,
Taku poporo tu ki te haumuti;
Taku wai whakatahetahe,
Ki te kauhanga riri;
He rianga tai, he rutunga patu, na koutou, ko tuakana, ki te one i Puruaha,
Takina atu ra, kia whana ai o ringaringa, kia hokai ai o
waewae.

Haere ra, e Pa,
I nga tai whakarewa kauri, ki te uru;
Tutanga po noa e! roto i a au,
Kei te aha to hara?
Kei nga hara tahataha nunui, o Tiki-maeroero.
Kei te aha to hara? kei nga turanga rau a te toa,
Kei o hianga,
I tukua atu ai, ka moe koe i te kino,
Te hoa, e-e-i.