page 20

KO TE TANGI A TARAAWHA MO TANA TAMAITI NA RERETAWHANGAWHANGA I PATU. NO NGATIRUANUI A TARAAWHA.

Ra te tai uru;
Ka koto ki te awa; he ho mai aroha.
Kia tangi atu au, e tama i konei,
E tama tukino!
I te tira haerenga, e kawea ana koe,
E te hianga rere; he hinengaro nunui.
Kei o matua, Kahore hoki te mata.
I hoki mai ki muri; kia ki atu au
“He ara aitua, te ara i runga Mahaukura
“He whenua kau ano, e ko te takotoranga,
“Koia te umu e tuwhera, paia iho te wai
“Koia te wai pa, kia rongo mai koe.”
E tama, wareware;
He wareware au,
Nga ngaki, e ngakia mai e koe,
Tena ano ra te tangata ngaki kai,
Te kopu pea, i takoto mai ai,
Tama ra.
Te whanaunga, i.
I pataia ai,
Te mau atu ai—E maha nga rangi!
E hira koa te toa i a Rere,
Te toa o Rehua? kahore au i rongo.
Te taha i mate ai,
I tangohia ai koe,
Ki te kurawiniwini,
Ki te kurawanawana;
Nga mahi a te iti.
Moe mai, e tama,
Te moenga matao,

page 21

Kia moe atu au,
Te moenga i ahuru,
Ekore puta atu,
I runga te tuturi,
I runga te tataramoa,
Nga heihei o Matuku.
Kaore i huna,
Te kaka tinotangata—
I kona Mauri
A te Kina
Tutahi-arahanga
Uruhape-ki-te-rangi; ka kite Te Pononga,
Taraponga tona patu,
E kia rangona ai
Te toa patu tangata i.
E ai e tama
Ma rau a Puteuru, ma te uri o Maru
O Tu-te-nganahau nana nga patu
Nga tao kaitohi, ki te takutai o Rurutu.
I rangona ki reira a Ururangiwheke
A Ururangipapa, e riri ana i waho,
Turakina, kia hinga iho ana,
Ko te Horihori i noho i te tuwhenua
Paku te whenua
Ngatata te papa i runga nei,
E tama ki a koe.
E uia iho koe
Mau e ki ake, “ko te ngako tena,
“ O Maramara te Ihonga,
“ O Tutakiao,”
Ka tau ia ki raro i
No nga puau
Hurihanga puau
No te tihi au,
O te rakau, e tu ki Tawhitinui.

page 22

Te tapu i a koe, a te Rangitakahia,
Tu-hokai-nuku,
Tu-hokai-rangi,
Te-reo-i-a-Turi,
Hei ara mou, ka whano ai koe,
Nga wai kirikiri, i roto i Oao.
Kia ahuria, o iwi matariki, e te rau e pae.
Tama a Hinemanu i
Maua to tamaiti, ki waho nga rae
Ki te toka tutahi, kia kai apu
Te ika i te moana; ka whakahoki mai
Ki runga i Okare, ki karanga atu au,
“ Haere mai e tama, i runga i te hakari,
“ E haria mai nei,
“ E te iwi ra i a.”