The Laws of England, Compiled and translated into the Māori language.
He Pukapuka — Na Te Kawana Ki Nga Iwi Maori O — Niu Tirani
[ko te tohutoro i roto i te reo Pākehā]
page break
He Pukapuka
Na Te Kawana Ki Nga Iwi Maori O
Niu Tirani.
E aku Hoa,
E nga Rangatira me nga Kai Whakahaere tikanga, me nga tangata Maori katoa, puta noa nga motu nei. Tena ra koutou. Whakarongo mai.
I mua, i kapi tenei whenua i te kino, i te pouri, i te he; kahore he kai whakapuaki mo te pai, kahore he kai atiati mo te kino.
Na wai a, ka tae mai nga Mihinare, ka korero ki a koutou i te kupu a Te Atua. Titiro ana koutou ki te pai o a nga Mihinare korero, ahuarekatia ana, manaakitia ana e koutou, hapainga ana hei tikanga mo koutou ko nga tikanga o te Whakapono, koia tenei kua mutu nei te nuinga o te kino ki tenei whenua.
Na, ko a nga Mihinare, he mea korero mangai atu ki a koutou i te tuatahi, muri iho, ka whakaakona koutou ki te korero pukapuka: na, ka whakamaoritia ko nga Karaipiture tonu a Te Atua; taia ana ki te perehi, tukua ana ki a koutou hei titiro iho ma tera, ma tera.
Na, ka tae mai, ko te Kawanatanga; homai ana, ko nga tikanga o te Ture o Ingarani; korerotia mangaitia atu ana ki a koutou aua tikanga; matakitaki mai aua hoki koutou ki ta te Pakeha whakahaere i tana Ture ki a ia ano. Kitea ana e koutou, ko te mahi kino, pokanoa, ka riria, ka whiua hoki e tenei Ture; ko te tika ka whakatikaia, ahakoa tangata iti, a ko te he ka whakahengia, ahakoa tangata nui. Inaianei, ko etahi o nga tangata Maori kua timata te matau, te whakaae, ki te pai o tenei Ture hei Ture mo nga tangata katoa o Niu Tirani, Pakeha, Maori hoki. Na, ka whakahaua iho nei e ahau kia tuhia nga tikanga nui o to Ingarani Ture, kia whakamaoritia, kia taia ki te perehi, kia tukua ki a koutou, hei titiro ma tera, ma tera.
Kahore aku pukapuka pera me ta nga Mihinare; na Te Atua tonu hoki nga kupu o ta ratou, ko nga kupu o te Ora tonu. Heoi, ko taku pukapuka page iika hoatu nei ki a koutou, he mea whakarapopoto i nga tino tikanga o tenei Ture tika, pai, nana a Ingarani i tupu ai,. i nui ai, i rangatira ai, i whiwhi nui ai tona Iwi ki te pai, ki te ora, ki te rawa, e noho nei.
Kahore he Iwi ke atu o te Ao i pera te pai o tona Ture: i a Ingarani anake ano te Ture i tino pai, i tino tika; a e aroha ana te Iwi katoa ki tona Ture, e rongo ana i tona Ture, e whakahonore ana, e whakanui ana i tona Ture. Ko te tangata whakaaro kino, e wehi ana, ta te mea, e mohio ana ia, ko te Iwi katoa kei te hapai i te Ture, a ko katoa ka riro hei hoa whakakaha i te Kai tiaki o te Ture, ara, i te Kai-whakarite-whakawa; na, kahore he rerenga mona.
Na konei hoki, kahore he wehi o te Katipa pirihimana ki te haere atu, tona kotahi, ki te hopu i te tangata kua whai hara ki te Ture; ko te Iwi katoa hoki hei tuara mona; na, ka, taea ano taua tangata hara te tiki atu e tona kotahi; tena, me i kaua te manaaki nui o te Iwi ki tana Ture, haere kau pea te ope nui ki te tiki; e riro mai ranei, kaore ranei.
Na konei i peneitia ai te whakatakoto i enei nga tikanga ki o koutou aroaro, hei tango ma koutou, hei pehea ranei; penei me nga tikanga o te Whakapono i whakatakotoria ki o koutou aroaro e nga Mihinare. Na, ki te kitea e koutou he mea pai enei, tangohia, manaakitia, kia wawe te noho tahi tatou: ki raro i te maru kotahi, ara, i to te Ture; kia tupu tahi ai tatou i runga i te pai.
Ko tenei, e hoa ma, to koutou pukapuka na! Korerotia; a ka tae ki te wahi kahore i ata marama te kupu, uia tona tikanga.
Heoi ano; Na to koutou hoa pono,
Na Te Kawana.
Whare o te Kawanatanga,
Akarana, Aperira,1858.