The Laws of England, Compiled and translated into the Māori language.
8. Arahona.—Tahu Whare, aha, aha
[ko te tohutoro i roto i te reo Pākehā]
page 328. Arahona.—Tahu Whare, aha, aha.
Me ngakau kino, me aro marire atu te tangata ki te mea i tenei Hara e meinga ai he Arahona. Me he mea aitua noa, whakaarokore ranei, ekore e meinga hei Hara-wheroni. Ta te Ture i titiro ai, ko te whakaaro o te tangata i mea ai ia i tetahi aha.
Me he mea i wera te whare i tetahi tangata, he mea aitua noa, me whakatakoto tona whakawa ki runga ki to te Hara-Hiwhiri tikanga whakawa. Ina hoki me he penei, he tangata ka haere ki te pupuhi manu, mea noa iho; na, aitua ana, he ahi no tana pu ka ka ki nga rau o te whare, wera ana. Na, ekore tenei e meinga hei Hara-wheroni.
Engari, he aronga ano na te tangata ki te mea i tetahi Wheroni, tupono noa, wera noa i a ia te whare o tetahi; ka meinga tenei hei Arahona. Ina hoki me he penei; haere ana te tangata ki te tahu i te whare o tetahi tangata, ka ke ana tona ahi ki te whare o tera atu tangata; ka meinga ano tenei hei Arahona. Me te penei ranei; tahu marire ana te tangata i tona ake whare, wera ana te whare o tetahi atu tangata i tutata ki tona, i tu ranei ki te wahi e tino mohiotia ana ekore e ora tera mehemea ka wera tenei; na, ka meinga tenei hei Arahona.
I tu a rite ano ta Mohi whakaritenga mo te mea penei, are, kia waiho i runga i te tikanga whakautu, ara, i runga i te tikanga whakawa Hara-Hiwhiri. "Ki te toro atu te ahi, a ka pono ki nga manuka, a ka pau nga puranga witi, te witi ranei e tu ana, te maara ranei; me ata whakautu e te tangata nana i tahu te ahi." (Ekoruhe 22. 6.)