22
Mahinga kiore

Na Ngai Tahu

Ka timata te mahi o te kiore i te ngahuru, i te marama o Aperira, i te timatanga tonu o nga ra. Ka rewa atu nga tangata Maori ki o ratou whenua mahinga kiore. I te ra tuatahi i mua ake o te ra e timata ai te mahi kiore ka mahia e nga tohunga Maori nga ritenga mo te karakia-tanga i nga mahi mo te kiore, mo te whakahaerenga katoatanga hoki i nga ritenga katoa e tika ai te mahinga; heoti ano, ka oti. Hei te ohonga ake i te ata ka timata te mahi i nga ara kiore; ka hangaia nga tawhiti ki roto i nga ara. Ka whakapaia katoatia nga tawhiti ki roto tonu i nga huarahi e haerea ana e te kiore, he tini noa iho nga tawhiti e hangaia ana ki te ara kotahi i roto i te ngaherehere a tena hapu, a tena hapu. He huhua noa atu nga ara kiore, he maha noa atu hoki nga ara kiore a te hapu kotahi. Hei te po ka haere nga kiore i roto i o ratou huarahi ki te rapu kai, tika tonu atu ki aua tawhiti kua oti ra te whakapai; mau tonu atu i tena tawhiti, i tena tawhiti, me te noho atu nga tangata i tahaki mai mo te mau mai, ka tiki atu ka takiri, ka whakapai ano. Pera tonu te mahi a nga tangata i te po; kia haea te pu o te ata ka mutu te haere o te kiore. Hei te awatea ka tahuitia nga kiore, ka maua mai ki nga kainga huhuti ai i nga huruhuru. Pena tonu i nga po katoa te mahi, a tae noa ki te mutunga o nga kakano ka mutu hoki te mahi, ka maeke hoki te kiore. Timata mai i a Aperira a tae noa ki te Toru, ki te marama o Hurae, ka mutu, e wha marama ka mutu katoa te mahi. He kai momona te kiore, he kai whakatetere i te tipu o te tangata. E pera ano me te weka te tahunga o tenei kai, o te kiore, e whaoina ana ki roto ki nga poha, ki nga ipu i mahia ai hei takototanga mo nga huahua o te kiore. He tino kai tenei na nga tino rangatira Maori o mua mai o nga tipuna, tuku iho, tuku iho ki ona uri. Me nga ara kiore hoki, tuku iho, tuku iho ki nga uri, me ona hapi mau tonu te mahi i tena tau, i tena tau, taea noatia te kinonga o nga mahinga kiore a nga Maori i te Pakeha, me te rironga hoki o te whenua i te Ingarihi. I rokohanga ano e Te Keepa e mahi ana nga Maori i te kiore me era atu kai a te Maori.