9. Ko Tangaroa Me Tana Whanau

Na Ngati-Kahungunu

Engari a Tangaroa, tuakana o Tane, he ira tangata; ko Tangaroa-a-timu, he ira tangata tenei. Ko Tangaroa-whakamau-tai na Rua-te pupuke tenei i pana ki te moana, ko te take mo te kohurutanga i a Te Manuhau-turuki, i whakamaroketia ra hei tekoteko mo Hui-te-ananui; ka mate i roto i Hui-te-ananui, ka waiho hei ingoa mo tena matenga ko Te Ahi-tahurangi. Ka rere nga morehu ki roto ki te wai i te tuawhenua, i te moana. Ka aranga te ingoa o tena whanau, apiti atu ki nga taina, ki te whanau a Te Pu-whakahara, a Takaaho, a Hine-moana, ka waiho hei ingoa mo ratau ko Te Aitanga a Tangaroa; i takoto ai te whakatauki, "He wai Tangaroa i haere ai ki uta." Ko tenei whanau kaore i ira tangata, koia te take i waiho ai hei amo i te waka i runga i nga karakia; mo te Wehenga-kauki, mo Tutara-kauika, mo Rua-mano, mo Arai-te-uru, ko enei kauika nana a Taki-tumu i amo mai ki Aotearoa nei. I takoto a Arai-te-uru ki te ngutu-awa o Hokianga hei tipua; ka waiho a Arai-te-uru hei ingoa waka, page 239e takoto mai ra i te pu o te tonga. Ko Ruamano ka waiho hei tiaki mo te toko o Takitumu i Toka-ahuru, i te taha rawhiti o te Tapuae o Rongokako. Taua toka a Toka-ahuru tona tohu o tenei toka ko Hikurangi kia noho ki te taha tonga o Pakarae. Kati tenei, ka marama koutou kaore he ira tangata o tenei whakapapa; tawika ra au e tariki mai i a Takitimu i roto o Pikopiko-i-whiti.