page 15

Whakarewarewa.
Tihema 28th, 1905.
I Whakatuwheratia Te Whare Ki Te Inoi I Runga Ite Kaupapa O Nga Mahi A Te Kotahitanga O Te Aute.
2 p.m.

Tiamana. Ka noho i tona turu whai mana. I timatatia nga mahi, ara nga take e pa ana ki nga whenua. Me te inoi atu kia Tuhourangi, "Tukua mai nga take e pa ana ki nga whenua, kia ata tirotirohia e tatou." Kia Ora koutou!

Apirana. "Ko nga take ma tatou hei korerorero ake ko nga mamae e pa ana ki o tatou whenua. E ngari kei pohehe koutou i haere mai ahau mo enei take. Tera ano te wa, kei a Hune e heke iho nei. Ka ma uta mai toku huarahi, kia matakitaki mai hoki i roto i nga Marae o te Tai-Rawhiti a ka tae mai ki konei; kia haere tonu ake i konei ki Poneke.

Ko tenei take e hara ite mea no naianei engari i timatatia mai i te tau 1900-1902-3-4-5, te rapurapu a te Ropu tamariki o te Kotahitanga o te Aute. Ka mohio ai koutou he tino take tawhito tenei. No reira ka penei atu ahau kia koutou, 'Haere mai, tangohia, whakaturia he manga mo te Kotahitanga ki tenei waahi; i te mea kei te kite tonu iho ki nga mate kua paa kia tatou. I na hoki te Ture Purotu. Kua rongo tatou kua kore te Kaunihera engari kua hoatu ke he ingoa, hou, kote Ture Poari (i whakamaramatia nga tikanga o te rarangi ono o te Ture Poari kote rongoa mo tena, me timata te ahu whenua). Nga waahi kei roto i tenei mate ko te Ikaroa me Waiariki. Ko te Tai-Rawhiti kei waho i tenei Ture. (Tera atu ano te roanga).

Taupopoki. Me penei atu na; "Mehemea he whakahe tau mo tena koiana katoa ma tatou."

page 16

Tamati Te Rangi. Koiana katoa ma matou, ko ta Taupopoki i mea atu na kia koe.

Tiamana. I na ra na e rapu nei, koia hoki i mea ai kia whakatoputia tatou kia kaha ai ki te rapu i te ora i roto i nga mate.

Terei Ngatai. He tautoko taku i nga korero a Apirana e whakamarama nei i te ahua o te mate mo tatou, i tenei ra ahu atu ki nga ra e heke iho nei. Kua rongo i nga whakamarama noreira ka penei ake taku; Kaore he rongoa mo enei mate e ora ai, ko te whakatopu anake ia tatou kia kotahi kia kaha ai te rapu i te ora, e puta ai tatou i roto i nga whakamamaetanga o te ngakau ki o tatou morehu whenua.

Hautehoro. Ko toku hiahia ko te mahi ahu whenua anake, koia taku tautoko mo tenei take. Ko te he anake ko nga whenua kei te topu tonu. Koinei te take i kore ai matou e mahi i nga whenua.

Mita Taupopoki. E mea ana ahau me tautoko katoa e tatou enei korero e korerotia mai nei, kia puta hoki te hua o ta tatou mahi ki te Motu katoa. E tautoko ana ahau i tenei korero.

Tumatahi. He tino tautoko rawa taku i tenei korero kia tino tutuki ai ki tona mutunga.

Te Wairama. E tautoko ana: E patai atu ana e taea ranei e koe te arai atu te Muru, te Hoko, me te Riihi a te Minita, i mua mai o Hurae.

Apirana. Kaore e taea e ahau te arai, e ngari ma tatou e mahi. Tuarua, ka hoki mai ano ahau ki konei, ki reira tatou ata mahi ai i tetahi karo mo te Ture Purotu. Kei te akiaki tena Ture, kua rongo ahau kei te tukua he petihana hei atiati; kei te pai tena engari kia kaha, Ko te Minita, ko te Pirimia, me Toone nga kai whakahaere o tena Ture. Penei me te Puna-a-Tuhoe kua rongo nei kua riro i te Ture Purotu. He mea atu, ki te tae mai taua Ture kaua e puritia engari tonoa i te wariu o te eka kia huihuia kia ruarau (£200) mo te roiara kia homai e te Kawanatanga. Ka mutu i konei. Kia Ora.