page break

Te Kotahitanga O Nga Tamariki O Te Aute Kareti.

Ko te Hui Kotahi tekau o tenei Ropu i tu ki Ohinemutu, Rotorua, i te 25 o nga ra o Tihema, 1905, tae atu ki te 1 o nga ra o Hanuere, 1906. He whakamarama poto i ona tikanga.

Ko nga mahi ma tenei Ropu huihuinga:

1.	Ko te whakakotahi me te huihui katoa i nga tamariki o Te Aute, i nga mea kua puta ki waho o te kura, me nga mea e kura ana i naianei; a he whakahoki mai i te ahua o te tangata ki ana i mahi ai i te kura, kei noumou noa nga matauranga.
2.	Ko te tautoko i te ora mo te iwi Maori, te ora mo te tinana, mo te hinengaro, me te wairua.

Ki te whakaaro iho a etahi o nga mema o te Kotahitanga kua tata tenei ki te wa e tika ai te whakawhanui i te Kaupapa o te Kotahitanga, kia uru mai ai ki roto ki ona whakahaere nga tangata e whai whakaaro nui ana ki te rapu i te ora mo te iwi Maori. Ko te whakatuturutanga i tenei whakaaro kua hikitia mo te hui a tera tau e haere mai nei.

Ko tenei Ripoata he mea tuhituhi e nga mema o te Komiti Ripoata o te Kotahitanga, engari ko etahi o nga korero o te timatanga i ngaro, he kore Komiti hei tuhituhi, no muri nei te Komiti i whakaturia ai. Mehemea kei te he te takoto o etahi o nga kupu, utaina mai ki te Etita te he, me te mahara iho ano, ki te taumaha rawa o te pikaunga i whakawaha mai ai ki ona pakihiwi. Mehemea i mohio ahau ka tukuna mai ki ahau te whakahaere i te Ripoata mo te perehitanga, kua whakarapopotongia ana nga mahi a nga Komiti. Ko tenei kua pakaru ke te hui, a no muri rawa nei ka tuturu te whakaaro kia waiho maku e whakahaere te perehi o nga korero o te Hui.