[Proceedings of some conferences held by Te Aute College Students' Association, 1897-1901, 1906]
Te Kotahitanga O Nga Tamariki O Te Aute Kareti
Te Kotahitanga O Nga Tamariki O Te Aute Kareti.
He whakamarama poto i ona tikanga.
Ko nga mahi ma tenei ropu huihuinga:
1. | Ko te whakakotahi me te huihui katoa i nga tamariki o Te Aute, i nga mea kua puta ki waho o te kura, me nga mea e kura ana i naianei; a he whakahoki mai i te ahua o te tangata ki ana i mahi ai i te kura, kei moumou noa nga matauranga. |
2. | Ko te tautoko i te ora mo te iwi Maori, te ora mo te tinana, mo te hinengaro, me te wairua. |
Ko te upoko o taua Kotahitanga he Tumuaki e pootitia ana i te tuunga hui o ia tau o ia tau, mo te kotahi tau. I raro iho i a ia ko nga mema, he honore mema, he tino mema. Ko nga honore mema he mea pooti i roto i te hui, he mea whiriwhiri mai i roto i nga tangata pakeha e awhina ana i nga mahi mo te ora o te iwi Maori, me nga rangatira Maori. Ko nga tino mema ko nga tamariki katoa o Te Aute, nga mea kua puta atu me nga mea e kura ana i naianei. Te kaiwhakahaere i te Kotahitanga me nga tikanga e whakatakotoria ana e te hui o ia tau, he Komiti Tumuaki kei Te Aute, ma te hui e pooti ona mema mo ia tau mo ia tau, me tango mai i roto i nga Mahita o Te Aute, i nga tamariki e kura ana i naianei me nga mea kua puta atu. Ma te Komiti Tumuaki e whakarite te ra me te kainga e tu ai te hui. Tera e tu he hui i ia tau i ia tau ki te pooti honore mema, Tumuaki, mema mo te Komiti Tumuaki, a ki te korero ki te whiriwhiri hoki i nga mea katoa e pa ana ki te iwi Maori.
Kei tua ake nei nga mema me nga apiha o te Kotahitanga mo te tau 1897.