Ko te hui tuatoru o te Kotahitanga o nga tamariki o Te Kareti o Te Aute i tu ki Taumata-o-Mihi Tuparoa, i te takiwa o Waiapu, i te marama o Tihema 1898, timata i te mane te 19 o nga ra, whakamutu ki te Taite te 22 o nga ra. Na Ngatiporou ano i powhiri kia tu te hui ki waenganui tonu ia ratou, a i kaha ta ratou tono. notemea he putanga tuatahi atu tenei no taua hui ki waho ki nga takiwa Maori. A i nui nga manaaki a Eruera Kawhia me era atu rangatira o N'Porou i hui mai. Ahuareka ana nga mahi katoa o te hui, ano i hikitia a tinanatia mai Te Kareti o Te Aute ki roto i te iwi tu ai, whakaatuatu ai i nga mea e mahia ana e ana tamariki, ka titiro te iwi, nga matua nga tupuna, ka koa, ka miharo. E kore e taea e te mangai te whakapuaki i te hari o nga taha e rua, o te manuhiri, o te tangata whenua, tera mo te ahuareka o nga mahi whakatetete a Ngatiporou, tenei mo te matakitaki tata atu i nga mahi a tenei kura rongo nui, e mahi nui tonu i te aroaro o te iwi, e ako ana i te ora mo te tinana, mo te hinengaro, mo te wairua. O te ra ano i hui mai ai, a tae noa ki te ra i wehewehe ai, kaore rawa a Ngatiporou i ngenge ki te whakarongo i nga kupu, kupu whaitikanga, e maka ana ki te aroaro o ia tangata, o ia tangata, kaore i tamate te haere o te korero, te whanui o te manaaki, engari i pumau tonu, otira i kake haere, a taea noatia te ata o te Paraire, wehewehe ana i runga i te pouri nui, i te tangi o te ngakau, a he roimata tonu te kinaki o te poroporoaki. E tumanako ake ana te ngakau tera e whaihua nga mahi a tenei kotahitanga, inahoki ko tana hui tuatoru i tino meatia e te ngakau Maori hei taonga nui whakaharahara. Tera ano nga ahuareka e wareware ake i roto i enei ra, ko te kakano o te kupu ka tupu ano ki ta Te Atua wahi i whakato ai, ki roto i te ngakau o te tangata marama, o te tangata whai mahara, o te tangata whakapono. E ki ana hoki ko te Kopa, ko te tangata ngahau, "ka ruru nga whetu, he hawere," ka ngaoko noa te kai o uta, te kai o te moana. Ma te Atua to whakatauki, e koro, e whakatutuki kia eke ki runga i nga tikanga e mahia nei e to whanau.

No te ata o te Mane ka tu mai te tima ki Tuparoa, ka u mai a Mita Hamiora Atirikona Wiremu, Tumuaki o te Kotahitanga, a Aata Wiremu tona iramutu, a Te Tatana, Mahita o Te Kareti o Te Aute, me etahi o nga tamariki o te Kareti. Tokorua nga tamariki i ahu mai i uta i Te Kaha ra ano, tokoono i Turanga, Kotahi i ma te tima mai i Akarana. No Taranaki, no Wairarapa, no Te Whanau a Apanui nga manuhiri o roto o taua hunga, haunga hoki o Ngatiporou ake tamariki, e hoki ana mai ki te kainga. Hui katoa te ope tamariki e 30 e 35 ranei, ki te tauia nga mea kua puta noa mai ra i te kura.

Ko Ngatiporou no te Mane me te Turei i hui ai, waiho atu ana a ratou na raruraru huhua. He nui nga rangatira i haera mai, na nga raruraru o etahi ka ngaro atu.

No te ahiahi o te Mane ka whakakiia e nga manuhiri te whare-karakia hou i Taumata-o-Mihi, ia Mita Hamiora te Kauwhau. Ka whakarongo reka te iwi ki nga kupu a tera kaumatua, e whakaeke ana i nga mahi a ona tamariki ki runga i te tikanga o te whakapono. I ki hoki ia ko te reo o tenei kotahitanga he reo e karanga ana ki te iwi, kia whakahokia mai te kiingi, kia whakahokia mai a Te Karaiti ki tana iwi.

Te mutunga o te karakia ka tomokia te wharehou o Eruera Kawhia; tena whare ataahua, tauhou, puta ke tona waihanga i roto i nga whare Maori o te Tai Rawhiti; e rua rawa hoki nga mataaho o te roro, e rua ano o te tuarongo hei putanga mo nga kino ki waho. Katahi ka haere nga manaaki. Ka huri kia Te Wiremu ma me Te Tatana, ka ahu ki nga tamariki, a na te mea ka ahi ahi tonu mai te ra, ka tukua kia moe.