Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Reports of meetings on Māori Church matters, 1872-1888

Nga Korero o Te Hui o Te Hahi Maori o Nga Takiwa o Waikato, o Te Akau

Nga Korero o Te Hui o Te Hahi Maori o Nga Takiwa o Waikato, o Te Akau.

I huihui nga tangata no ratou nga ingoa i mua ake nei ki te whare karakia i Kohanga, a, ka mutu te karakia i te Hapa a te Ariki, ka timata te korero. Ko ta te Pihopa tenei:—I pouri ia i tera tau mo te korenga o te Hui ki Kohanga, whakaaturia ana te take i kore ai ia i tae ake, he rongo hoki nona ka kore he tangata mo taua Hui. Tetahi pouri ona mo to tatou kaumatua, mo te Ahiwera, kahore nei i tae mai i te ahua mate ona. Otiia tenei te kai whakapuaki korero mo Taupiri, ko Hohaia, he monita kaha ia, he mea kua matauria. Erua ona take i koa ai a te Pihopa, he hokinga mai no te Hahi o Waikato ki te ora; ara, tetahi, ko nga tangata mea ake nei ka whakaukia ki Taupiri, i te mea ka whitu nei nga tau i kore ai taua mea ki reira; tetahi take he whare karakia hou ka taia nei e ia te kawa ki te Akau. E aroha ana ano nga tuakana i Ingarani, me nga hoa o roto o te Hahi o tenei Pihopatanga, ki te morehu o nga Maori o Waikato; titiro hoki he maha nga mea i homai ki nga minita me etahi atu i te tau kua mahue nei. Tetahi tohe a te Pihopa kia uaua nga tangata o taua Hui ki te akiaki i to ratou nuinga kia whakatungia he kura mo a ratou tamariki; kia aroha hoki ki nga minita Maori e noho nei. A ma te Hui e whakaatuatu mai ki a ia a ratou mea i kite ai, nga ritenga ra e neke ake ai te mahi, e whakatupuria paitia ai te Hahi i tenei takiwa o tenei Pihopatanga. Ka mutu taua korero ka whakaritea a Rev. Hori Manihera hei kai tuhituhi, hei kawe i nga korero a te Hui kia perehitia.