Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Reports of meetings on Māori Church matters, 1872-1888

Ko te kokero a te Upoko ki te Hui.–

Ko te kokero a te Upoko ki te Hui.

I Karakia te Hui ki te Whare-karakia i Peria. Nga tangata i tango i te. Hapa Tapu 51: ko te kohikohi £1 14s. 7d. mo nga mea a te Hui.

Ka mutu te Karakia ka noho te Hui, a, ka oti te karangaranga nga ingoa o nga tangata o te Hui e te Upoko, ka kiia e ia he Hui i rite ki ta te ture. Ka tu a te Atirikona ka korero:—ko enei ana korero.—

E hoa ma! Tena koutou, Me whakapai tatou ki te Atua, mona i tiaki i a tatou, i ata arahi hoki i a tatou kia kite tetahi i tetahi, he kanohi he kanohi. Ko ahau e tu atu nei, he whakakapi mo te Pihopa. He maha no ana mahi te haere mai ai ia hei Upoko mo tenei Hui o te Hahi Maori. Na reira ia i karanga ai i a au hei whakakapi mona. E rite ana tenei tikanga ki ta te Ture a te Hinota Nui i whakatakoto ai.

I ta tatou Hui ki te Waimate i Aperira ka pahure nei, kotahi ano te mea i takoto i a tatou, ara, ko nga Komiti hei kohikoki Tahua whangai Minita mo ia Takiwa mo ia Takiwa i roto i tenei Atirikonatanga. Kua timataia taua mahi ki etahi o nga wahi: ina hoki £52 2s. 6d. to Parengarenga; £10 0s. 0d. to Pariranewha; £11 0s. 0d. to Whangarei.

Erua nga Whare-karakia pai o tenei tau. Kei te Kawakawa tetahi. Nga utu £115 0s. 0d. Nga tangata e ō e 60. Ko te rua o nga Whare-karakia nei, kei Ahipara, e £60 0s. 0d. i utua ai nga kamura; na nga maori i kani nga papa, 150 nga tangata e ō ki roto. Erua hoki nga Whare raupo, kotahi kei Roto-Kakahi, kotahi kei Here-Kino. Kua whakaorangia te Whare i Matauri, erangi kahore ano i oti te papa takatakahi. Kua ea te nama o te Whare-karakia o te Waimate.

Ma nga tangata o tenei Hui e akiaki nga tangata o o ratou kāinga kia tahuri nui ratou ki te kohikohi whangai Minita. E tino matau ana hoki ahau, e kore rawa e tupu te Hahi, ara, e kore nga tangata e tahuri ki te whakarite i nga mea o to tatou whakapone, ki te kore nga hapu nunui page 4katoa e tu i te Minita Maori hei noho tuturu i roto i a ratou. Na e hara i te moni nui te moni e karangatia ana mo tenei mahi: kia £140 kia £150 ranei, a heoi ano.

Titiro hoki, e taea ana e nga hapu iti noa iho nei te £200 hei hoko i nga kai mo nga tangi mate.

Tenei hoki tetahi mea nui hei mahinga ma tatou, ara kia tahuri katoa tatou ki te patu i te taniwha e whakatahuri nei i te waka o te whakapono. E hoa ma e tineia ana te maramatanga o te Hahi e te Waipiro. Ki taku whakaaro, he mea noa nga Karakia Hauhau me etahi atu o nga karakia hianga a te maori; tera e mate noa iho: tena ko tenei mea nanakia e kore e mate ki te waiho noa iho. Ko te mea tenei hei arai i te pai mo te tinana raua ko te Wairua. Tere tonu nga tangata ki te hoko i te mea whakamate, puhoi tonu ki te hoko i te mea e tau ai te pai, e noho ora ai te tangata ki runga i te whenua, e whai tumanakotanga ai ki te rangi. E kara ma, kia kaha ki te patu i te ngarara e horo nei i te tokomaha o taton.

Tenei hoki tetahi mea,—ka whiwhi nei tatou ki te maramatanga o te Rongo-pai, ko te mea tika kia whai whakaaro ano tatou ki nga iwi e noho pouri ana i te ao. Me whakarite pea e tatou tetahi Ratapu hei ra kohikohi ma nga kāinga katoa i etahi moni kawe i te Rongo-pai ki nga Tauiwi.

Tenei hoki tetahi mahi, Me whakatakoto tikanga tatou mo nga mahi a nga Pariha, me whakarite e ia Pariha, e ia Pariha, etahi tangata hei hoa mo te Minita, hei whakahaere i nga mea e tika ai, e pai ai nga mea o te Karakia.

Kotahi atu mea e kite nei ahau; kia whakatuturutia te tokomahatanga o nga tangata e mana ai nga mahi a tenei Hui. He mea hoki kei whai raruraru etahi o nga Minita (Mangai Reimana ranei,) a ka kore e tae mai ki te Hui; Na kua he nga mahi i te torutoru o nga tangata. Koia ahau i mea ai, Me whakarite pea e tatou, kia tokotoru Minita, kia toko-ono nga Mangai Reimana.

Ma te Wairua o te Atua e whakamarama o tatou hinengaro, e whakakotahi o tatou ngakau, kia rapua ai e tatou etahi tikanga e whai Kororia ai te Atua, e tau ai te pai ki nga tangata.

E. B. Karaka.

Upoko.

He tikanga na te Hui o te Hahi Maori o te Waimate, mo nga mahi a nga Pariha.