Reports of meetings on Māori Church matters, 1872-1888
He Kupu Karanga Atu Tenei Na Matou Na Te Hahi — Maori Kia Pihopa Kaui
He Kupu Karanga Atu Tenei Na Matou Na Te Hahi
Maori Kia Pihopa Kaui.
Haere mai e Kara e te Pihopa, haere mai; haere mai. Haere mai korua ko Mihe Kaui, me ta korua whanau.
No te mea i to korua haerenga ki Ingarangi i whai kupu poroporoaki ano nga minita Maori kia koutou, engari kahora nga tangata noa iho i uru mai ki taua poroporoaki. Hoi ra, ko matou katoa tenei, ko nga minita me nga mangai Reimana o te Hahi Maori, ka uru tahi inainaei ki te karanga ia koutou. A ē hari ana matou inaianei mo koutou i hoki ora mai i runga i te mahi tohu. Ona e rongo nei te hau mei te moana ki a la. No te mea ko te huarahi i haerea na e koutou e mau ana tona whakatauki ko te ara tapokopoko a Tawhaki.
Kua uru na koe, e te Pihopa, ki te Runanga Nui o ou hoa Pihopa ki te whakahaere tikanga e tupu ai e kaha ai te Hahi. Kua kite ano hoki koe i nga kaumatua o te Hahi na ratou nei i tuku mai te Rongopai ki tenei motu i te wa o te kuaretanga o matou matua, na reira hoki i tupu mai ai nga painga katoa, a tae noa mai ki naianei.
E Kara i tou taenga ki Ingarangi nui rawa atu tau mahi, kahore koe i whakata i tou manawa. Ahakoa ra e hari ana matou mou ka tae mai ki te whangai i enei hipi o te kahui a te Karaiti ara, i nga Maori me nga Pakeha.
Hoi anake te raruraru i muri ia koe ko te taenga mai o nga Momona ki te kukume i etahi o matou. Otira hoi anake te hunga i riro i a ratou ko nga tangata kihai nei i ngoto te whakapono ki o ratou ngakau ā e kore e mohiotia e pehea ranei a muri ake nei.
E ora katoa ana nga minita me nga kai karakia, e puta ngatahi ana to ratou uaua ki te mahi i tukua nei kia ratou.
Ko te mutunga tenei o ta matou karanga.
Haere mai e te Pihopa, Haere mai e to matou whaea e Mihi Kaui, Haere mai e tamara ma, Haere mai.
Na o tamariki i roto i a te Karaiti.
Na nga mema o te Hui o te Hahi maori.
Paihia, Maehe 13, 1889.