Title: Reports of meetings on Māori Church matters, 1872-1888

Author: Church of England. Diocese of Auckland

Publication details: Henry Hill, 1872, Auckland

Part of: He reo nō ngā rōpū whakahaere tikanga / The language of Māori governing bodies.

License: Creative Commons Attribution-Share Alike 3.0 New Zealand Licence

He poroporoaki tenei na matou, na nga minita Maori o te Pihopatanga o Akarana kia te Pihopa.

Haere atu e Pa i runga i te rangimarie, kauria atu te moana nui a Kiwa e takoto na, me te ara tapokopoko a Tawhaki. He mea tika kia ta matou whakaaro kia whai mihi matou kia koe mo tou haerenga ki te whenua o ou matua, ki te whenua i tupu mai ai te Rongopai ki tenei motu; ki reira whakata ai i tou manawa, inahoki, ko te tekau ma waru tenei o nga tau i mahi ai koe i roto i te Hahi Maori. He nui to matou whakamoemiti mo to kaha ki te haere ki te tirotiro i a matou: kahore hoki tetahi kainga rahi i kore e taea e koe; timata mai i Parengarenga, puta noa ki Waikato, ki Taranaki, poto katoa ia koe te haere. E rua tahi ahua o nga hipi o te kahui e hepara nei koe, he Pakeha, he Maori; heoi, rite tonu tau whangainga i a matou tahi, kihai etahi i whakatikia; koia nei ta matou whakapai kia koe.

I tou taenga mai tokoono anake nga minita Maori o tenei Pihopatanga; i muri iho i enei kotahi tekau ma wha o au i whaka-minita ai. O aua minita e rua tekau, tokorima kua tae ki to ratou okiokinga, tokorua kua puta ki tetahi atu Pihopatanga. Tenei ano hoki tetahi mea e mihia nuitia ana e o tatou ngakau, ko te ngaronga atu o te hunga tokotoru i tenei tau na konei matou i rite ai ki te "kahui nohinohi" i tou aroaro i tenei ra.

I tou taenga mai he torutoru nga whare karakia; a, inaianei kua kapi katoa te takiwa o Hauraki tae noa ki Parengarenga i nga whare karakia papai; he tohu katoa enei e mohiotia ai i tupu te Hahi i aua tau tekau ma waru. Ahakoa, tenei ano ia etahi takiwa i roto o te Pihopatanga kahore ano i hoki mai ki te whakapono; ki te whakaaro iho e tata ana te taima e tahuir mai ai etahi wahi o Waikato.

Na, e Kara, pouri rawa matou i to matou rongonga ai e hoki ana koe ki Ingarangi, a oti atu. Otira, kua rongo matou i to kupu ki te Hinota tera ano koe e hoki mai, na konei i marie ai o matou ngakau. Te take o te pouri.—(1) He aroha kia a koe—(2) He wehi kei ara mai tetahi kingi kihai i mohio kia Hohepa.

Na, me whai kupu mihi ano matou ki to matou whaea kia Mihi Kaui. Kanui hoki tona kaha ki te haere ki nga kainga Maori me tona whai whakaaro ano ki o matou hoa wahine me a matou tamariki. Tena koe e Mihi Kaui, e to matou whaea atawhai. Haere atu i runga i te rangimarie; kei wareware koe ki a enei tamariki au.

He kupu mihi ano tenei na matou kia korua tamariki na te mea i whanau ratou ki konei, na kona i whanaunga ai kia matou. Haere atu e tamara ma me o tatou matua.

Heoi ra e Kara, haere atu me te mau atu i te aroha o nga Maori o te Pihopatanga. Ma Ihowa koutou katoa e hipoki ki raro ihona hou, a ki raro ki ona arirau koutou piri ai. Ma taua Hepara nui o nga hipi koutou e manaaki e tiaki i te moana, e whakahoki mai ano i runga i te rangimarie i runga i te ora. Koia na ta matou e tumanako ai, e inoi ai. Ahakoa na matou na nga minita tenei poroporoaki, na te iwi katoa o te Hahi Maori.