Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Reports of meetings on Māori Church matters, 1872-1888

[section]

I Mine te Hui o te Hahi Maori o te Atirikonatanga o te Waimate, hui ki te takiwa o Kaipara, ki Ohaeawai i Hanuere 14, 1880. I karakia ki te wharekarakia o Mikaera, a tango ana nga tangata o te Hui i te Hakarameta o te Kainga tahitanga tapu. Ko te ohaohatanga £5 Is. i tukua hei hanga i tetahi weteri mo te wharekarakia. Ka mutu te karangaranga i nga ingoa o nga tangata o te Hui, ka kiia e te Pihopa he Hui e rite ana ki ta te ture i whakatakoto ai. Ka mutu ia te Pihopa te inoi mo te Hui, ka korero ia i tana whaikorero.

E ora ana taku ngakau mo tatou ka mine tahi inaianei ki te rapu tikanga e neke ai, e kaha ai nga mahi a te Hahi. Ko etahi o tatou i haere mai i nga whenua tawhiti ara i Parengarenga, i Waiheke, i Kaipara. Ko te wahi e moho nei tatou he pa whawhai i te tau 1845—Ko nga pakeha e whawhai ana ki nga Maori, ko nga Maori ki nga pakeha. Ko tenei me uru tahi tatou ki te whawhai atu ki to tatou hoariri ki te kino. E ora katoa ana nga minita i hui tahi ra tatou ki Oruru i 1879, a, e Mahi ana tenei ki tana wahi, tenei ki tana wahi. Ko etahi o nga minita i araia e te raruraru te tae mai ai. Me whakawhetai atu tatou ki te Atua mo tana mahi tohu ki te whakaroa i to tatou taima ki te ao hei mahinga ma tatou ki a ia. Na, kei ngoikore tatou a taea noatia te ra e karanga iho ai ia kia whakamutua te mahi, a kia tomo ki tona okiohinga. Kotahi o o tatou hoa kua tangohia atu i tana mahi i te tau kua pahure nei.—ko Reihana Tarahaea, kai karakia o te Waimate. Ki te mahi tikatia te mahi a te kaiwhakaako he nui noa atu te pai e tau iho ki a ia ake, a ka maharatia tonutia ia me ana kupu ina mate ia. E pouri tahi ana tatou mo te ngaronga atu o to tatou hoa o Rev. Piripi Patiki, inahoki he mate te take i kore ai i tae mai i Hokianga. He pai anake nga korero mo nga mahi o te Hahi o nga takiwa katoa o te Atirikonatanga nei i tukua mai ai o ratou Mangai ki tenei Hui. Ahakoa kahore ano ahau i kite noa i te maha o nga Iriiringa, o nga tangata kua rite mo te Whakaunga, ki taku whakarongo e Maha ana. Tokotoru nga tangata i noho ki Akarana ki te kura whakaako minita mo te Hahi i te tau 1879 a e pai ana nga korero mo ratou a o ratou kaiwhakaako. Ko a te Ratapu e haere ake nei whakarikonatia ai tetahi o aua tangata ki te Waimate, a he tono tenei naku kia tae katoa atu nga tangata o tenei Hui a taua ra. Otira kei mea tatou ko nga Iriiringa, ko nga Whakaunga ko nga Whakaminitatanga anake nga tohu e kitea ai e tupu ana te Hahi; kahore, ma te rite o nga mahi o ia tangata, o ia tangata, ki ta te Karaiti i whakahau ai e mohiotia ai te pono o te mahi ki te Atua. Whakatupuria a koutou page 4tamariki ki runga ki te mohio, ki te wehi ki te Atua, whakaakona ratou ki nga Karaipiture kia whiwhi ai ratou ki nga tikanga e tau ai te pai whaka-te-ao te pai whaka-te rangi hoki. Te hunga tika ma ratou tenei mahi, ma nga matua ma nga minita, me whakaako ki te whare moa iho, ki te wharekarakia hoki—Ki taku matau e mangere ana te nuinga o nga matua ki taua mahi, na reira i kitea ai me whakaako nga tamariki ki nga mea o te Atua ki nga kura Kawanatanga. Kahore te Kawanatanga e riri ina whakaakona nga tamariki Maori ki nga Karaipiture ki nga kura. Koia ahau ka whakahau atu ai ki nga minita kia whaingakau ratou ki tena mahi, me nga matua hoki kia akiaki ratou i o ratou tamariki kia rongo ki nga akoranga o nga minita. Me ata whakarite e nga minita ratou ko nga kaiwhakaako kura, te taima hei taenga atu ma te minita ki te whakaako i nga Karaipiture. Ko ta nga minita e whakaako ai i te tuatahi ko ta te Pukapuka Inoi i whakaatu ai, ara ko nga kupu o te Whakapono Karaitiana, ko te inoi o te Ariki, me nga Ture kotahi tekau. Kahore he mahi i nui ake i tenei ma nga minita, a me titiro tatou kia rite te maha o nga minita kia taea ai tena mahi. E hari ana ahau mo te nuinga haeretanga o te Tahua whangai minita, e ata tiakina nei e nga kaitiaki i Akarana. No te tau kua pahure nei i tapiritia £10 mo te tau ki to ratou oranga. Kua homai hoki e nga kaitiaki tetahi moni hei whakamama i nga mea a nga minita e pau ana ia ratou e haerere ana ki nga Hinota. Ekore nga kaitiaki e ahei te homai moni ma nga reimana i roto i taua Tahua, otira tera pea e kitea he huarahi e puta ai he mea ma ratou. Ka nui taku whakapai atu ki nga kaikarakia mo te mau tonu o to ratou uaua ki te mahi; ki te kahore hoki ratou he maha nga wharekarakia e tu kau i nga Ratapu i te kore kaikarakia. E maha haere ana nga wharekarakia o tenei Atirikonatanga. Kua oti te wharekarakia hou ki Waiparera, Hokianga; a e hangaa ana to Oromahoe. Ko nga tangata o Kaikohe kua timata te mahi rakau mo tetahi wharekarakia hou mo ratou. E kohikohi ana nga tangata o te Rawhiti mo to ratou whare a meake pea timata te hanga. Kahore ano he wharekarakia ki Waikare ki Waiomio, a he tono tenei naku kia tahuri hoki ratou ki taua mahi. He whakamahara atu taku kia koutou kia tuhituhi koutou i o koutou ingoa ki te Rehita o te Hahi kia ahei ai koutou te pooti mangai reimana ma koutou. Ki te kahore te tangata e rehitatia e kore ia e ahei te uru ki te pooti mema Hinota, Hui Hahi Maori ranei. Ko Maehe te marama e rehita ai ia tau ia tau. Tenei ano nga kai kawe i te Rongo pai ki nga motu a Meranihia te whai mahara ana ki te Hahi Maori, inahoki.no te marama kua pahure nei i tae mai ai ta ratou kohikohi mo te Tahua whangai minita e £7. I tuhituhi au i tetahi panui maku ki nga minita, ki nga whakaminenga o ia wahi, o ia wahi hei whakaatu i te tikanga o te Tahua whakamahara mo Pihopa Herewini e kohikohia nei i teneipage 5Pihopatanga. I whai utu ano taku panui inahoki kau tukua mai he moni e nga takiwa o tenei Atirikonatanga. Ma te Atua e homai he hinengaro marama kia tatou kia kitea ai he tikanga e whai kororia ai Ia, e tau ai te pai mau tonu ki te Hahi Maori.