Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Reports of meetings on Māori Church matters, 1872-1888

Ko Enei Nga Tikanga o Era Atu Hui e Mau Tonu Ana

page 7

Ko Enei Nga Tikanga o Era Atu Hui e Mau Tonu Ana.

I.
Mo Nga Kura Ratapu Mo Nga Tamariki.

He whakahau tenei ki nga wahi katoa o tenei Atirikonatanga mo nga Kura tamariki i nga Ratapu kia tu tonu.

II.
Kaua Nga Whare-Karakia e Waiho Hei Whare-kura Ra Noa.

Ki te whakaaro o tenei Hui, ekore e tika kia waiho nga Whare-Karakia hei whare-kura i nga ra noa, engari me whaka-motuhake mo te Karakia anake; a me whakatu ano nga whare-kura. Ehara tenei tikanga i te pei i nga tamariki i nga kura, erangi he mea kia motu kē te Whare-Karakia, kia motu kē te whare-kura.

III.
Kia Aroha Nga Tangata Ki Nga Minita Ina Haerere.

Kia whai aroha nga tangata o tenei Atirikonatanga ki nga Minita ina haerēre ki nga kainga, kia tukua noatia te hoiho me te kai-arahi.

IV.
Mo Nga Moni Haerere a Nga Mangai Reimana.

Kia whakāro nga tangata o nga Pariha ki o ratou Mangai Reimana, ki te whakaea i nga moni e pau ana ia ratou e haerēre ana ki nga Hui. Ko aua moni me tango i roto i nga Kohikohi, me kohi ra waho ranei.

V.
Mo Nga Turoro Kia Whakaturia Ki Te Minita.

He kupu tenei ki nga tangata katoa o ia Pariha, o ia Pariha, mo nga turoro kia whakāturia mai ki te Minita; kia kaua e waiho kia takoto noa iho a taea noatia to ratou matenga, ka korerotia ki te Minita. He tino mea pouri tenei.

VI.
Ko Nga Kai-karakia Kia Whakaarohia e Nga Tangata.

Kia whai whakāro ano nga tangata ki o ratou Kai-Karakia ehara nei i te Minitia, ki te whakamama i a ratou.

page 8

VII.
Mo Nga Tupapaku.

E whakaae ana nga tangata o tenei Hui, ki puta ta ratou uaua ki te pehi i enei tikanga kino a te Maori mo nga tangihanga me nga nehunga tupapaku.

(1) Ko te tanu Kawhena kore.
(2) Ko nga tikanga Maori mo nga wahi kua waiho nei hei tanumanga tupapaku.
(3) Ko nga hākari tangihanga, ara, ko te whakapaunga o nga kai a te pouaru ratou ko nga pani.
(4) Ko te waipiro i nga tangihanga me nga nehunga.
(5) Ko te ahua tapu o nga kai-tangotango i te tupapaku.

He Inoi Mo Te Hui o Te Hahi Maori.

E te Atua kaha rawa, kua oti nei te whakakotahi e koe Tau hunga whiriwhiri katoa hei tinana mo Tau Tama, mo to matou Ariki, mo Ihu Karaiti: ki te huihui hoki o tangata ki tetahi wahi i runga i tona ingoa, kei reira ano Koe: Kia anga mai to whakaaro atawhai ki tenei wahi o To Hahi, manaakitia mai hoki matou, te Pihopa me nga Minita me nga Mangai o te iwi kua mine mai nei ki te rapu tikanga. Kia riro mai i a matou nga taonga maha a Tou Wairua Tapu, ara, te mahara, te mohio, te kaha, te aroha, me te ata whakaaro; kia whai tonu ai matou i roto i a matou mahi katoa ko Koe kia whakakororiatia, ko te pai o To iwi kia kake, ko Tou rangatiratanga kia whakanuia. Kei meatia tetahi mea e matou i runga i te tikanga totohe, i te whakapehapeha, i te mataku ranei i te tangata: kei he hoki a matou mahi i te whakaaro poka noa ake, i te hianga ranei o te tangata: engari kia ata whakatakotoria nga tikanga katoa e tupu pai ai To Hahi i roto i a matou; kia mahia ai e matou katoa nga mahi pai kua rite mai nei i a Koe hei mahinga ma matou; kia [unclear: whakakotahitia] ai matou katoa i roto i te whakapono, i te aroha; kia rite tahi ai hoki o matou whakaaro me o matou mangai ki te whakakororia i a Koe; ko Ihu Karaiti hoki to matou Ariki. Amine.