[Printed letter, 17 March 1865, about Völkner’s murder and Hauhauism]

Tena koutou. Kua tae mai pea te rongo ki a koutou o te kohuru i mahia mai ra i Opotiki. Ko nga tangata nana taua kohuru, ko nga tangata e kawe haere ana i te Atua Hau hau. U rawa atu te kaipuke ki reira, katahi ka tangohia nga pakeha i runga hei herehere. Tokorua nga Minita i roto, ko to ratou Minita ake ano tetahi. Ko tena i whakatarewatia, patua rawatia, mate rawa, muringa iho mahia kinotia ana me he mea he kuri te tangata.

      Ko nga hua tenei o tenei mahi hou e mahia nei o te Hau hau.

      Ko tenei, e hoa ma, kia tupato koutou ki nga tangata e haere mai ana ki te tawai kia koutou kia tahuri koutou ki tenei tikanga.

Kua kawe nga tangata o Whanganui ki runga ki tena taha, te tukunga iho, kua mate ratou i nga tangata e whakaaro tika ana. Muri iho, i tenei wa tata ake ano, kua whawhai ano taua iwi te Hauhau ki a te Anaua raua ko Mawae, a mate ana taua iwi, 20 i riro i te mate, 80 i riro herehere. Ko Pehi Turoa tetahi i roto i taua iwi, no te matenga i te whawhai, ka tahi ka tahuri ki te taha ora ki te taha pakeha.

      I mahara au kia ora tenei waka, a Takitimu, kia kore he waikura.

He kupu atu tenei kia koutou kia mohio koutou kia kaha ki te pehi i enei nga whakaaro e whakaporangi nei i te tangata.