Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

[Correspondence, March 1865, relating to Hauhauism in Hawke’s Bay]

Pakowhai, Maehe 20, 1865. — Na te huihuinga katoa ki Pakowhai i te taenga mai o Ngatitoa, o te Atiawa, o Ngatiraukawa, me nga Rangatira o Heretaunga

                                                      Pakowhai, Maehe 20, 1865.
Na te huihuinga katoa ki Pakowhai i te taenga mai o Ngatitoa, o te Atiawa, o Ngatiraukawa, me nga Rangatira o Heretaunga.

Ki a te Kawana.

E hoa,—He reta whakaatu tenei na matou i to matou pouri mo tenei mahi kino a te Hauhau e mahia nei ki to tatou motu. I te riri ano matou i mua ake nei mo te kawenga mai ki o matou kainga ako haere ai, ka panaia atu kia hoki atu ki ona whenua mahi atu ai. Ko tenei, ka rongo nei matou ki tana mahi kohuru i a te Wakana, Minita i Opotiki, ka nui rawa atu to matou pouri, to matou wetiweti noa iho. Katahi ano hoki te tinana o te kohuru whakahouhou rawa ka kitea ki Nui Tireni. Tera ano nga tangata mau patu hei hoa riri mona kia kitea ai tona toa; anga noa iho tenei ki te tangata ringaringa kore, ki te tangata hara kore, ki tona matua ake. To te tautaua tona ahua, parea ketia iho ana te mata o tana rakau ki tona matua nana ia i whakatupu.

Na aua kaikohuru i anga atu ma runga i ena iwi haere ai, i puta ai ratou, i roa ai ia e korero haere ana. Me he mea hoki ia i tutuki mai makonei, kua mau ia i a matou, penei ma o matou ringaringa ano e hoatu ki a koe; kua kore nei e tae mai, a, kati, ka waiho tonu tenei hei ture ma matou mo nga kai hari i nga upoko Pakeha ma runga i o matou wahi; ki te tahuri mai ia ki ahau, kaore ia e waiho, ka mate ia i au.

E hoa, kia rongo mai koutou ko nga iwi; katahi ano kanui rawa to matou pouri ki nga mahi o to matou whenua. Na wai ra i riri ki a raua whakatangata, ka riri hoki tenei ki te Atua, ka hou haere tenei ki nga mahi ano o te pouritanga ra ano. Otira, kei mahara mai koe na te katoa tenei mahi kino; kei te nui ano nga iwi kaore ano i uru noa ki enei mahi kino—ma te Atua e atawhai e tiaki.

                                    Heoti ano, na o hoa,

                                                      Na Karaitiana,
                                                      Na Wi Tako,
                                                      Na Renata Tamakihikurangi,
                                                      Na Matene Te Whiwhi,
                                                      Na Henare Matua,
                                                      Na Wi Parata,
                                                      Na Karanama te Kapukai,
                                                      Na Henare Tomoana,
                                                      Na Te Wirihana Toatoa,

         Otira na matou katoa.