Kia Te Petetone,—
E hoa, tena koe. Kua tae mai nga korero o to taenga ki Otaki, ko te kupu o Wi Tako raua ko Heremia, kua tae atu te pukapuka a te Kingi kia ratou kia patu Pakeha raua. E pohe ana matou. Ina te Pukapuka a te Kingi kia matou. He pukapuka whakatupato kau kia matou, koia tena ka tukua atu na kia kite tonu iho koe i aua korero. Mehemea hoki nana taua reta ki Wi Tako raua ko Heremia, kua penatia mai hoki te reta kia matou, kia tahuri matou ki te patu i nga Pakeha.
E hoa, i te kimi noa matou i te tikanga e kiia nei e o matou hoa Pakeha he kohuru te take o te whawhai ki Akarana. No te korenga e marama i a matou, tonoa ana ta matou karere ki te putake o te riri, ui ai. No te po o te Hatarei nei i tae mai ai. Kaore tonu te take kohuru a te Maori e kiia nei e te Pakeha, na reira i timata ai te riri a te Kawana. Kahore tonu i rangona; heoti ano nga take i mohiotia, ko te panapananga mai o nga Maori i Akarana, i runga i o ratou kainga ake, ko te tahutahunga i o ratou hanga me o ratou whare, katahi; ko te whakawhitinga i Mangatawhiri, karua. Ki te mea kei te mohio koe tena ano tetahi take, whakaaturia mai, kia wawe te mohiotia atu e matou.
E hoa, tenei matou te titiro iho nei ki te he o o matou iwi Maori, te patunga o nga Pakeha ki Tataraimaka. Heoti, kahore hoki e ngaro i a matou te he o te Kawana, nona kahore i whakama-rama wawe i te kupu mo Waitara i te tuatahi, i te take o te he ki Niu Tireni. Marama rawa te take, hei reira ka whai atu ai ki nga peke.
I konei matou e tatari noa atu ana kia te Kawana, kei te ritenga o ta matou korero ki a ia i tona taenga mai kia kite i a matou, mo Waitara kia whakawakia. Kiia mai ana e te Kawana i reira, ko Waikato kei te herehere. Ka ki atu matou, Kia kotahi hoki whakamatauranga kia Waikato; ka kore e whakaae, ka oti ki a ia. Karangatia e koe te ra hei whakawakanga; e nui ana nga iwi kei te whakaae ki te whakawa. Ka tahuri ai tatou ki te whakawa i tena he, kia wawe ai te mutu atu. He oho mauri tonu ko te rongo matenga o nga Pakeha ki Tataraimaka. He oho mauri tonu hoki i te rua o nga oho mauritanga, E, tenei ko Waitara, tenei ka hoki mai; tukua rawatia kia kino, katahi ka whakahokia mai; te whakahoki mai i te wa marama, kia kitea ai te whakatoatoatanga o te kino ki te piki mai i te pai a te Kawana, kia mohiotia ai na te Maori tonu ano ana kino i hoatu ki te Pakeha.
E hoa, kia kaha koo ki te patu i nga kino o to tatou Motu. Na o hoa aroha e mahi nei i te mahi kotahi, ki te kukume mai i nga tangata ki runga ki te pai.
Heoi ano.
Na Renata Tamakihikurangi.
Karaitiana Takamoana.
Te Wirihana Toatoa.