Maehe 28, 1862.

Ka whakatika ko Hemi Marupo, ka korero i te tikanga o nga utu mo ratou, ka mea kia rite tonu te utu mo matou ki te wha tekau, kia pena tonu ko nga kai tiaki Ture kia rite te toru tekau, mo nga Kai Whakawa, kia rua tekau.

Ka tu a Wi Hau. E ui ana ahau ki te mea i iti ai maku, he tutua ranei noku, he Rangatira pea no aku hoa, otiia he Rangatira katoa ano matou, koia au i mea ai kia rite tonu.

Ka tu ko Aperahama Taonui. Ko taku tikanga tenei, aua tatou e karanga i te utu mo nga kai tiaki ture, mo nga Kai Whakawa, mo nga karere hoki. Heoi ano ta tatou e whakarite ko te utu mo tatou anake, mo te hunga o te Runanga, otiia e ratou, kahore aku tino titiro ki enei mea, ara, ki te tikanga o te moni; ko taku tino mea tenei e pai nei ahau, ko te rangimarie ki te whenua, ki nga tangata hoki.

Ka tu ko Moetara. Tenei taku, ekore hoki ahau e pai kia apo au kia nui ake, ka rite ano i te wha tekau heoi ano, engari ka tika nga mahi, hei reira ka koni ake ki te rima tekau, a ka tika amuri atu, ka koni atu.

Ka tu ko Arama Karaka Pi. Tenei taku, me koni hoki te utu mo nga Karere, ta te mea page 13ka nui pea tenui o ta ratou mahi; ko nga Kai-whakawa, me koni ki te rua tekau.

Ka tu ko te Hira Awa. Ko tuku tenei, kia wha tekau. Kia pena katoa, aua e koni ma etahi aua e iti mo etahi, kia rite tonu ko nga Kai-whakawa kia rua tekau.

Ka tu ko Kingi Wiremu. E mea ana ahau kia rite tonu, aua e puta ke mo tetahi i to tetahi.

Ka whakatika a Aperama Taonui, ka korero i te tikanga mo te pukapuka whakaari mo etahi moni apiti mo te tahi rau pauna a te Kawana hei hanga mo te whare Runanga.

Ka whakatuturu nga tangata o te Runanga ka mea atu a Aperahama: E hoa ma, kahore ano tatou i tae noa ki te hohonutanga o nga ture o te Pakeha, aua tatou e rapu engari me tango tatou i tenei tikanga, e pai ana ahau ki tenei tikanga.

Ka whakatika ko Wi Hau. E whakaae ana ahau ki tenei kupu.

Ka whakatika ko Kingi Wiremu. E pai ana ahau ki tenei kupu.

Ka whakatika a Hemi Marupo. E pai ana au ki tena kupu.

I tenei wahi ka korero te Runanga mo Maihi Rotohiko kia whakahokia mai ano ki tana mahi whakawa, kia kaua tana mahi e whakamutua, a whakaae katoa ana ratou.

I mutu i konei nga korero o tenei Runanga timatanga.