Maehe 26, 1862.

Ka whakatika a Maihi Paraone Kawiti.

Ka korero, Tenei ano taku kupu e kara e te Karaka, ko te ra tenei i timata ai te whakatu o tenei Runanga ki tenei pito whakararo ki Pewhairangi, ara ki te Waimate. Ko taku kupu tenei, e whakae ana a hau ki te ture, ki enei tikanga kua oti nei te whakatakoto ki o matou aroaro; ko taku whakaae tenei, ka tapoko a hau ki tenei Runanga. Na ko tetahi taha tenei o taku kupu ka maua nei e ahau ki toku Runanga ki taku iwi hoki, ma taku iwi hoki a hau ka tika ai, ki te kahore, e kore au e meinga he tangata. Na ko tenei e kara, e te Karaka, ka mea atu taku kupu ki a Kawana e rapu ana hoki au ki te tahi kupu mai ma Kawana, mo aku pukapuka, mo taku Runanga i te Kawakawa, i maua e te Waka ki a Kawana, kia whakahokia mai, kia rongo au kua oti ranei te whakakahore, kahore ranei; otira, ki a tino rongo a hau i tona whakakahoretanga mai. Heoi ano aku kupu ki a koe e te Karaka.

Ka whakatika a te Waka. Tenei ano taku kupu e whakatika ana ahau ki to kupu e Maihi, e kore hoki taua e tika ki a taua anake, ma te iwi hoki taua e tika ai, ki a uru katoa nga tangata o ia hapu, o ia hapu, ki roto ki tenei mahi, ka pai.

Ka whakatika ko Kingi Wiremu Tareha. Kia rongo mai koutou ki taku kupu, me tango mai etahi atu Rangatira o nga hapu hei hoa mahi tahi mo tatou i tenei mahi ki a tika ai ta tatou hapai i enei tikanga o roto i tenei Runanga i enei mahi hoki.